ក្រោយទទួលបានការណែនាំដ៏ខ្ពង់ខ្ពស់របស់ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប, នាថ្ងៃពុធ ៣រោច ដល់ថ្ងៃព្រហស្បតិ៍ ៤រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣-៤ ខែមិថុនា ឆ្នាំ២០២៦ កន្លងទៅ ក្រុមការងារអគ្គលេខាធិការដ្ឋានអាជ្ញាធរទន្លេសាប បានចុះសិក្សា វាយតម្លៃរកមូលហេតុដែលបណ្តាលឱ្យត្រីងាប់ច្រេីនស្ថិតក្នុងទីតាំងអភិរក្សជលផលតាមោក សហគមន៍កំពង់ឃ្លាំង ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ក្រុមការងារបានជួបពិភាក្សាប្រមូលព័ត៌មានពីអាជ្ញាធរមូលដ្ឋាន ជំនាញជលផល គណៈកម្មការសហគមន៍នេសាទ ប្រជានេសាទ កងកម្លាំងជំនាញពាក់ព័ន្ធដែលនៅប្រចាំការយាមល្បាតក្នុងភូមិសាស្ត្រតំបន់នេះ និងបានកំណត់និយាមកាយកសំណាកទឹក ។
ការចុះសិក្សានេះមានសារ:សំខាន់សម្រាប់ឱ្យយើងអាចដឹងពីមូលហេតុនាំឱ្យត្រីងាប់ ពិភាក្សាផ្តល់យោបល់ដល់សហគមន៍ដេីម្បីរៀបចំផែនការធ្វើឱ្យប្រសើរឡើង សំដៅកាត់បន្ថយត្រីងាប់នៅឆ្នាំបន្តបន្ទាប់ ក្នុងកន្លែងអភិរក្សជលផលតាមោក ឃុំកំពង់ឃ្លាំង ស្រុកសូទ្រនិគម ខេត្តសៀមរាប ក៏ដូចជាកន្លែងអភិរក្សផ្សេងៗទៀតនៅជុំវិញបឹងទន្លេសាបទាំងមូល៕
