កាលពីថ្ងៃចន្ទ ១៤កើត រហូតដល់ថ្ងៃព្រហស្បតិ៍ ២រោច ខែជេស្ឋ ឆ្នាំម្សាញ់ សប្តស័ក ពស ២៥៦៩ ត្រូវនឹងថ្ងៃទី៩ រហូតដល់ថ្ងៃទី១២ ខែមិថុនា ឆ្នាំ២០២៥ លោកស្រី ទេស សុដាវី អនុប្រធាននាយកដ្ឋានរដ្ឋបាល ផែនការ និងសហប្រតិបត្តិការ បានដឹកនាំក្រុមការងារយេនឌ័ររបស់អាជ្ញាធរទន្លេសាប ចុះធ្វើការលើកកម្ពស់ការយល់ដឹងយេនឌ័រ និងកសាងសមត្ថភាពស្ត្រី លើការការពារ ថែរក្សា ទប់ស្កាត់ និងគ្រប់គ្រងនៅតំបន់ទន្លេសាប ស្ថិតនៅក្នុងឃុំអូរសណ្តាន់ និងឃុំអន្លង់ត្នោត ស្រុកក្រគរ ខេត្តពោធិ៍សាត់។
ការចុះអនុវត្តសកម្មភាពនេះ ផ្ដោតសំខាន់លើការប្រមូលព័ត៌មាន និងទិន្នន័យប្រជាពលរដ្ឋជាស្ត្រី បុរស កុមារ ចាស់ជរា និងជនពិការ ដែលស្ថិតនៅក្នុងតំបន់តាមរយៈអាជ្ញាធរមូលដ្ឋាន ដើម្បីបញ្ជ្រាបការយល់ដឹងយេនឌ័រក្នុងការ ការពារ ថែរក្សា ទប់ស្កាត់ គ្រប់គ្រង និង យល់ដឹងពីសារៈប្រយោជន៍ ធនធានធម្មជាតិរបស់បឹងទន្លេសាប ក្នុងការចែករំលែកចំណេះដឹង និងបទពិសោធន៍ ជាពិសេសកសាងសមត្ថភាពស្ត្រីឱ្យ មានភាពអង់អាចចូលរួមចំណែកទប់ស្កាត់ មានសិទ្ធិបញ្ចេញមតិយោបល់ និងមានសិទ្ធិសម្រេចចិត្តលើការអនុវត្តការ ងារក្នុងស្មារតីចូលរួមលើកកម្ពស់សមភាពយេនឌ័រ ដោយមិនមានភាពរើសអើងក្នុងការអភិវឌ្ឍន៍ នៅតំបន់បឹងទន្លេសាប។
បន្ទាប់ពីក្រុមការងារបានធ្វើការចុះស្វែងយល់ពីការយល់ដឹងយេនឌ័រដោយផ្ទាល់ពីអាជ្ញាធរមូលដ្ឋាន និងប្រជាពលរដ្ឋទាំងស្ត្រី បុរស មនុស្សចាស់ ជនពិការ និងកុមារ ដែលស្ថិតនៅក្នុងឃុំអូរសណ្តាន់ និងឃុំអន្លង់ត្នោត ស្រុកក្រគរ ខេត្តពោធិ៍សាត់ មានការយល់ដឹង និងមានការចូលរួមក្នុងការពារ ថែរក្សា ទប់ស្កាត់ និងគ្រប់គ្រងធនធានធម្មជាតិនៅតំបន់ទន្លេសាបប្រកបដោយ សមភាព និងសមធម៌យេនឌ័របានល្អប្រសើរ៕
