ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប នៅថ្ងៃព្រហស្បតិ៍ ១០រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៩ ខែកក្កដា ឆ្នាំ២០២៦ ឯកឧត្តម ខូវ មាស អគ្គលេខាធិការរង នៃអាជ្ញាធរទន្លេសាប បានអញ្ជើញចូលរួមសិក្ខាសាលាថ្នាក់ជាតិ ស្តីពី សេចក្តីព្រាងរបាយការណ៍តាមដានភាពសម្បូរត្រី និងភាពចម្រុះប្រភេទត្រីឆ្នាំ២០២៣-២០២៤ និងពិនិត្យលើការគ្រប់គ្រងមូលដ្ឋានទិន្នន័យនៅខេត្តកំពង់ឆ្នាំង ដោយមានការចូលរួមពីក្រុមការងារគណ:កម្មាធិការជាតិទន្លេមេគង្គកម្ពុជា តំណាងរដ្ឋបាលជលផល តំណាងអាជ្ញាធរទន្លេសាប និងក្រុមការងារជំនាញការថ្នាក់តំបន់នៃលេខាធិការដ្ឋានគណៈកម្មការទន្លេមេគង្គ(Mekong River Commission-MRC)។
សូមជម្រាបថា គណៈកម្មការទន្លេមេគង្គ (MRC) បានអនុវត្តកម្មវិធីត្រួតពិនិត្យភាពសម្បូរត្រី និងភាពចម្រុះនៃប្រភេទត្រី (FADM) ជាប្រព័ន្ធត្រួតពិនិត្យការនេសាទទូទាំងអាងទន្លេមេគង្គជាប្រចាំនៅតាមបណ្តាប្រទេសអនុតំបន់ទន្លេមេគង្គ រហូតមកដល់ពេលបច្ចុប្បន្ន។ កម្មវិធីនេះបានផ្តល់ព័ត៌មានស្តង់ដារ និងមានរយៈពេលវែង ដើម្បីវាយតម្លៃស្ថានភាព និងនិន្នាការនៃការនេសាទត្រីនៅក្នុងអាងទន្លេមេគង្គក្រោម និងដើម្បីគាំទ្រដល់ការគ្រប់គ្រងធនធានទឹកក្នុងតំបន់ ក៏ដូចជាការធ្វើការសម្រេចចិត្តលើការនេសាទត្រី។ កម្មវិធីនេះបានរួមចំណែកដោយផ្ទាល់ដល់សូចនាករចំនួនប្រាំដែលទាក់ទងនឹងការនេសាទនៃក្របខ័ណ្ឌសូចនាករក្នុងអាងទន្លេមេគង្គ៖ (i) ភាពចម្រុះនៃត្រី (ii) ភាពសម្បូរនៃត្រី (iii) កិច្ចខិតខំប្រឹងប្រែងនេសាទ (iv) ទំហំត្រី និង (v) ភាពចម្រុះ និងភាពសម្បូរនៃប្រភេទសត្វដែលបានណែនាំ បានពិនិត្យរួមគ្នា ដើម្បីផ្តល់នូវការយល់ដឹងរួមបញ្ចូលគ្នាអំពីនិន្នាការ និងស្ថានភាពនៃការនេសាទ។
សិក្ខាសាលានេះមានគោលបំណងសំខាន់ៗ៖
- ពិនិត្យ និងពិភាក្សាអំពីរបាយការណ៍តាមដានភាពសម្បូរត្រី និងភាពចម្រុះប្រភេទត្រីឆ្នាំ២០២៣-២០២៤ និងផ្ទៀងផ្ទាត់ទិន្នន័យ និងការរកឃើញសំខាន់ៗ។
- ពិនិត្យឡើងវិញនូវការអនុវត្ត ការតាមដានភាពសម្បូរត្រី និងភាពចម្រុះប្រភេទត្រី (FADM) ការតាមដានកូនត្រីម្ស៉ៅ (FLDM) និងការគ្រប់គ្រងមូលដ្ឋានទិន្នន័យ។
- លើកអំពីបញ្ហាប្រឈមនានានៅតាមតំបន់ និងឱកាសសម្រាប់ការកែលម្អ៕
