នារសៀលថ្ងៃសុក្រ ៦រោច ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៥ ខែសីហា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប បានដឹកនាំក្រុមការងារមន្ត្រីបច្ចេកទេសអាជ្ញាធរទន្លេសាប ទទួលបន្ទុកការអនុវត្តគម្រោងក្រោមកិច្ចសហប្រតិបត្តិការជាមួយសាធារណរដ្ឋប្រជាមានិតចិន ចូលរួមកិច្ចប្រជុំពិភាក្សាការងារ ជាមួយក្រុមអ្នកជំនាញការចិន នៃវិទ្យាស្ថានស្រាវជ្រាវវិទ្យាសាស្ត្រទន្លេឆាងជាំង (Changjiang River Scientific Research Institute) ដឹកនាំដោយ Mr. Zhou Yinjun, Deputy Director of River Research Department (RRD), CRSRI នៅលេខាធិការដ្ឋានអាជ្ញាធរទន្លេសាប។
កិច្ចប្រជុំខាងលើនេះ ក្នុងគោលបំណង ដើម្បីពង្រឹងកិច្ចសហប្រតិបត្តិការ និងការផ្លាស់ប្តូរបច្ចេកទេសផ្នែកអន្តរកម្មនៃទន្លេ បឹង ការស្រាវជ្រាវជលសាស្ត្រ និងការគ្រប់គ្រងធនធានទឹកប្រកបដោយនិរន្តរភាព និងទស្សនកិច្ចសិក្សាប្រមូលព័ត៌មានសម្រាប់ “ជំរុញកិច្ចសហការការងារ នឹងរួមចំណែកដល់កិច្ចខិតខំប្រឹងប្រែងរួមគ្នា រវាងក្រុមការងារបច្ចេកទេសនៃអាជ្ញាធរទន្លេសាប និងក្រុមអ្នកជំនាញការចិន ក្នុងការយល់ដឹងអំពីសក្ដានុពលដ៏ស្មុគស្មាញនៃបឹងទន្លេសាប និងតំបន់ពាក់ព័ន្ធជុំវិញ ក៏ដូចជាការកំណត់នូវឱកាសសហការ សម្រាប់ការសិក្សាស្រាវជ្រាវបែបវិទ្យាសាស្ត្រ និងការអភិវឌ្ឍគម្រោង ស្នើសុំកិច្ចសហការរួមគ្នា រវាងអាជ្ញាធរទន្លេសាប ជាមួយនឹងមជ្ឈមណ្ឌលសហប្រតិបត្តិការធនធានទឹកទន្លេមេគង្គ-ឡានឆាង ដែលក្នុងនោះមាន គម្រោងចំនួនពីរ ត្រូវបានដាក់ស្នើសុំការគាំទ្រពីមូលនិធិពិសេស នៃកិច្ចសហប្រតិបត្តិការមេគង្គ-ឡានឆាងសម្រាប់ឆ្នាំ ២០២៦។
- គម្រោងទី១: ការផ្លាស់ប្តូរទំនាក់ទំនងរវាងទន្លេ និងបឹង និងឥទ្ធិពលរបស់វាលើបឹងទន្លេសាប(Change of The Relationship between River and Lakes and Its Impact on the Tonle Sap Lake)
- គម្រោងទី២: ប្រព័ន្ធតាមដានត្រួតពិនិត្យតាមដានរបាយទឹកភ្លៀង និងការព្រមានគ្រោះថ្នាក់អាកាសធាតុក្នុងអាងទន្លេសាប (Intergrated Monitoring System for Rainfall Monitoring and Disastrous Weather Early Warning For Tonle Sap Basin)។
ជាមួយគ្នានេះ ក្រុមអ្នកជំនាញការចិន ក៏បានធ្វើបទបង្ហាញពីការសិក្សាស្រាវជ្រាវថ្មីៗផងដែរ៕
