នាព្រឹកថ្ងៃចន្ទ ១០រោច ខែពិសាខ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី ១១ ខែ ឧសភា ឆ្នាំ២០២៦ ដោយទទួលបានអនុសាសន៍ណែនាំដ៏ខ្ពង់ខ្ពស់ពី ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប ឯកឧត្តម ហ៊ែល តូនី អនុប្រធានអចិន្ត្រៃយ៍អាជ្ញាធរទន្លេសាប បានដឹកនាំកិច្ចប្រជុំ ណែនាំ និងផ្តល់យោបល់ដល់ថ្នាក់ដឹកនាំបច្ចេកទេសក្រោមឱវាទ អគ្គលេខាធិការដ្ឋាននៃអាជ្ញាធរទន្លេសាប ដើម្បីបន្តពង្រឹងកិច្ចប្រតិបត្តិការដោយរៀបចំក្រុមការងារ និងដាក់សកម្មភាពចុះតាមដានពិនិត្យ អធិការកិច្ច និងចាត់វិធានការណ៍សម្របសម្រួលដោះស្រាយរាល់បាតុភាពសកម្មភាពខុសច្បាប់ ដោយទង្វើនៃការរំលោភដីព្រៃលិចទឹក ការយកបឹងបួធ្វើអាជីវកម្ម និងការកសាងហេដ្ឋរចនាសម្ព័ន្ធមិនមានការអនុញ្ញាតត្រឹមត្រូវស្ថិតក្នុងដែនព្រៃលិចទឹកតំបន់ ៣ នៃខេត្តទាំង ៦ ជុំវិញតំបន់ទន្លេសាប។
សូមជម្រាបថា តំបន់បឹងទន្លេសាប ក្រោមផ្លូវជាតិលេខ ៥ និងលេខ ៦ ស្ថិតក្នុងភូមិសាស្ត្រខេត្តទាំង ៦ (ខេត្តកំពង់ឆ្នាំង, ពោធិ៍សាត់, បាត់ដំបង, បន្ទាយមានជ័យ, សៀមរាប និងខេត្តកំពង់ធំ) ត្រូវបានរាជរដ្ឋាភិបាលកំណត់បែងចែកជា ៣ តំបន់ និងមានការបែងចែកការប្រើប្រាស់ខុសៗគ្នា ៖
▪︎ តំបន់ ១ តំបន់លំនៅដ្ឋាន និង/ឬ ភូមិករ មានលក្ខណៈជាអចិន្ត្រៃយ៍ស្របច្បាប់ និងជាតំបន់សេដ្ឋកិច្ចចម្រុះ
▪︎ តំបន់ ២ តំបន់អាស្រ័យផល ក៏ជាតំបន់ទ្រនាប់ផងដែរ ជាដីសាធារណៈរបស់រដ្ឋ ស្ថិតនៅចន្លោះតំបន់១ និងតំបន់៣
▪︎ តំបន់ ៣ តំបន់ដែនព្រៃលិចទឹក និងព្រៃលិចទឹកគ្រប់ប្រភេទ ជាដីសាធារណៈរបស់រដ្ឋ ត្រូវការពារដាច់ខាត៕
