នារសៀលថ្ងៃចន្ទ ២កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៥ ខែសីហា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប នៅសាលប្រជុំរដ្ឋបាលខេត្តកំពង់ធំ ឯកឧត្តម ជា សុខនី អគ្គលេខាធិការរងអាជ្ញាធរទន្លេសាប និងក្រុមការងារ បានអញ្ជើញចូលរួមកិច្ចប្រជុំផ្សព្វផ្សាយស្តីពី ការរៀបចំផែនការប្រើប្រាស់ដីតំបន់បឹងទន្លេសាប ក្នុងភូមិសាស្ត្រខេត្តកំពង់ធំ ក្រោមអធិបតីភាពឯកឧត្តម ឡោ ដាវុ រដ្ឋលេខាធិការ និងជាប្រធានក្រុមការងារប្រតិបត្តិក្នុងភូមិសាស្ត្រខេត្តកំពង់ធំ និងឯកឧត្តមអភិបាលខេត្តកំពង់ធំ ។
កិច្ចប្រជុំនេះ មានការអញ្ជើញចូលរួមពីថ្នាក់ដឹកនាំ និងមន្ត្រីជំនាញក្រសួងរៀបចំដែនដី នគរូបនីយកម្ម និងសំណង់ តំណាងក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន អាជ្ញាធរទន្លេសាប រដ្ឋបាលខេត្តកំពង់ធំ មន្ទីរពាក់ព័ន្ធ និងរដ្ឋបាលក្រុងស្រុកទាំង ៦ ជុំវិញខេត្តកំពង់ធំ។
កិច្ចប្រជុំមានគោលបំណង ដើម្បីធ្វើការផ្សព្វផ្សាយសេចក្ដីព្រាង និងលទ្ធផលបឋមរបាយការណ៍ ស្ដីពីការពិនិត្យផ្ទៀងផ្ទាត់ ធ្វើបច្ចុប្បន្នភាព និងចងក្រងទិន្នន័យដីធ្លី នៃតំបន់បឹងទន្លេសាប ក្នុងភូមិសាស្ត្រខេត្តកំពង់ធំ និងប្រមូលធាតុចូលផ្សេងៗទៀតពីអង្គប្រជុំ ដើម្បីដាក់ឱ្យអនុវត្តន៍នាពេលខាងមុខ៕
