នារសៀលថ្ងៃព្រហស្បតិ៍ ៥រោច ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៤ ខែសីហា ឆ្នាំ២០២៥នេះ នៅទីស្តីការក្រសួងរៀបចំដែនដី នគរូបនីយកម្ម និងសំណង់ ឯកឧត្តម ហ៊ែល តូនី អនុប្រធានក្តាប់រួម និងជាសមាជិកគណៈកម្មការសុរិយោដីថ្នាក់ជាតិ និងសហការី ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានអញ្ជើញចូលរួមកិច្ចប្រជុំគណៈកម្មការសុរិយោដីថ្នាក់ជាតិ ក្រោមអធិបតីភាពដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការសុរិយោដីថ្នាក់ជាតិ។
សូមជម្រាបថាការរៀបចំកិច្ចប្រជុំនេះឡេីង គឺដើម្បីពិភាក្សា និងធ្វើសេចក្តីរាយការណ៍អំពីលទ្ធផលនៃការចុះវាស់វែង និងការចុះបញ្ជីក្បាលដី ព្រមទាំងការដោះស្រាយវិវាទ នៅទូទាំងប្រទេស ដោយមានសមាសភាពចូលរួមពីតំណាងក្រសួង ស្ថាប័ន និងអភិបាលនៃគណៈអភិបាលរាជធានី ខេត្ត ដែលជាសមាជិក។
គិតមកដល់ពេលនេះមានខេត្តចំនួន១៩ បានបញ្ចប់ការងារវាស់វែងដីធ្លីមានលក្ខណៈជាប្រព័ន្ធ ក្នុងនោះខេត្តចំនួន៨ បានរៀបចំពិធីប្រកាសបញ្ចប់ការវាស់វែងជាផ្លូវការរួចរាល់។ លទ្ធផលជារួម ក្បាលដីដែលបានវាស់វែងសរុបមានចំនួនជាង ១៣,៦លានក្បាលដី និងក្បាលដីដែលនៅមិនទាន់វាស់វែង មានប្រមាណជា ១១ម៉ឺនក្បាលដី៕
