នាថ្ងៃអង្គារ ៩កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៧ ខែមករា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប, ឯកឧត្តម ម៉ៅ ហាក់ អនុប្រធានអាជ្ញាធរទន្លេសាប និងជាប្រធានក្រុមការងារ បានដឹកនាំក្រុមការងារបច្ចេកទេសអគ្គលេខាធិការដ្ឋាន អាជ្ញាធរទន្លេសាប សហការជាមួយមន្ទីរធនធានទឹក និងឧតុនិយម ខេត្តកំពង់ធំ អាជ្ញាធរដែនដីពាក់ព័ន្ធ ចុះពិនិត្យ រុះរើ និងដំឡើងឡើងវិញនៅទីតាំងថ្មីរបស់ស្ថានីយជលសាស្ត្រ និងឧតុនិយម(H.R)ត្នោតជុំ ដែលប៉ះពាល់ដោយសារគម្រោងសាងសង់ផ្លូវលំជនបទ និងសាងសង់សំណង់ស្ពាន ១កន្លែងក្នុងក្របខ័ណ្ឌកម្មវិធី RID4CAM នៃអង្គភាពគ្រប់គ្រងកម្មវិធីអភិវឌ្ឍន៍ហេដ្ឋារចនាសម្ព័ន្ធជនបទ(RID4CAM) របស់ក្រសួងអភិវឌ្ឍន៍ជនបទ នៅចំណុចស្ពានត្នោតជុំ ស្ទឹងជីនិត ឃុំត្នោតជុំ ស្រុកបារាយណ៍ ខេត្តកំពង់ធំ។
សូមជម្រាបជូនថា សកម្មភាពការចុះពិនិត្យផលប៉ះពាល់ស្ថានីយជលសាស្ត្រនេះ ឯកឧត្តមប្រធានក្រុមការងារ បានបន្តដឹកនាំក្រុមការងារ ចុះសិក្សាជ្រើសរើសទីតាំងថ្មីដើម្បីដំឡើងស្ថានីយ ១កន្លែង ត្រង់ចំណុចសំណង់ស្ទាក់ទឹកស្ទឹងជីនិត (X:502661, Y:1384169) ស្ថិតក្នុងភូមិសាស្ត្រភូមិកងមាស ឃុំត្នោតជុំ ស្រុកសន្ទុក ខេត្តកំពង់ធំ។
គួររំលឹកផងដែរថា ស្ថានីយជលសាស្ត្រ និងឧតុនិយម H.R) នេះ ជាឧបករណ៍វាស់កម្ពស់ទឹក និងឧតុនិយម មួយក្នុងចំណោម ១១ ស្ថានីយ ដែលទទួលបានពីគម្រោងកិច្ចសហការរវាងអាជ្ញាធរទន្លេសាប និងវិទ្យាស្ថានស្រាវជ្រាវជលសាស្ត្រ និងស្វ័យប្រវត្តិកម្មការអភិរក្សទឹកណានជីង (មេគង្គ-ឡាងឆាង) នៃក្រសួងធនធានទឹកចិន ក្រោម គម្រោងសាកល្បងនៃការអង្កេតទិន្នន័យជលសាស្ត្រ និងបច្ចេកវិទ្យាបញ្ចូនស្វ័យប្រវត្តិ តំបន់អាងទន្លេសាប ឆ្នាំ២០២១ -២០២២៕
