ការសិក្សាតាមដានពីធនធានត្រីតាមបណ្តាអាជីវកម្មឡូត៍ដាយនៅខេត្តកណ្តាល និងរាជធានីភ្នំពេញរដូវនេសាទឆ្នាំ 2015-2016
ក្រុមការងារនៃអាជ្ញាធរទន្លេសាប ដឹកនាំដោយសាស្ត្រាចារ្យ លឹម ពុយ ដែលមានការចូលរួមពីមន្ត្រីនាយកដ្ឋានត្រួតពិនិត្យការធ្វើអាជីវកម្ម និងអភិរក្ស និងមន្ត្រីនាយកដ្ឋានធនធានធម្មជាតិ បានចុះសិក្សា តាមដាន ពីធនធានត្រីនៅអាជីវកម្មឡូត៍ដាយទាំង 15 ជួរ នៅខេត្តកណ្តាល និងរាជធានីភ្នំពេញ នៅថ្ងៃទី 15 ខែវិច្ឆិកា ឆ្នាំ 2015 ។ លទ្ធផលសង្ខេប មានដូចខាងក្រោម៖
- កំពស់ទឹកទន្លេសាបនៅស្ថានីយព្រែកក្តាម៖ នៅថ្ងៃទី 15 ខែវិច្ឆិកា ឆ្នាំ 2015 មានភាពទាបជាងប្រមាណ 1.50 m បើប្រៀបធៀបទៅនឹងឆ្នាំ 2014
- ល្បឿនទឹកនៅតាមបណ្តាជួរឡូត៍ដាយទាំង 15 ជួរ មានភាពខុសគ្នា៖ នៅបណ្តាជួរឡូត៍ដាយដើមទឹក ល្បឿនទឹក មានប្រមាណពី 0.70 m/s ទៅ 0.80 m/s ចំណែកឯបណ្តាជួរឡូត៍ដាយនៅចុងទឹក ល្បឿនទឹក មានប្រមាណពី 1.1 m/s ទៅ 1.4 m/s
- ផលចាប់ នៅតាមបណ្តាជួរឡូត៍ដាយដើមទឹក មានប្រមាណ 20 kg/ថ្ងៃ ចំណែកឯបណ្តាជួរឡូត៍ដាយនៅចុងទឹក មានប្រមាណក្រោម 5 kg/ថ្ងៃ តែប៉ុណ្ណោះ
- ក្នុងចំណោមប្រភេទត្រីប្រមាណ 48 ប្រភេទ ដែលបានដកស្រង់ពីសំណាក ប្រមាណជាង 90% សុទ្ធសឹងជា ត្រីដែលមានប្រវែងក្រោម 8 cm ។ ប្រភេទត្រីដែលមានតម្លៃខ្ពស់ ដូចជា ត្រីកេស ត្រីប្រម៉ា ត្រីក្លាំងហាយ ត្រីប្រា ត្រីអណ្តាតឆ្កែនិងត្រីច្រកែង សុទ្ធសឹងជាត្រីដែលមានទម្ងន់ក្រោម 100g ។
ក្រុមការងារនៃអាជ្ញាធរទន្លេសាប នឹងបន្តការសិក្សា តាមដាន លើផលចាប់ ប្រភេទត្រី ប្រវែង/ទម្ងន់ ព្រមទាំងការវាស់វែងល្បឿនទឹក និងកំពស់ទឹក រហូតដល់ចុងខែមករា ឆ្នាំ 2016 ។
