ការចូលរួមសិក្ខាសាលាផ្សព្វផ្សាយស្តីពីការពង្រឹងនូវការយល់ដឹង និងការចូលរួមកិច្ចសហប្រតិបត្តិការមេគង្គក្នុងក្របខណ្ឌ CNMC និង MRC
នាថ្ងៃទី ១៦-១៧ ខែវិច្ឆិកា ឆ្នាំ២០១៥ លោក យ៉ាន់ សំរិទ្ធ ប្រធាននាយកដ្ឋាននីតិកម្ម និងផ្សព្វផ្សាយ នៃអាជ្ញាធរទន្លេសាប បានអញ្ជើញចូលរួមសិក្ខាសាលផ្សព្វផ្សាយ ដែលរៀបចំដោយគណៈកម្មាធិការជាតិទន្លេមេគង្គកម្ពុជា ស្តីពីការពង្រឹងនូវការយល់ដឹងនិងការចូលរួមកិច្ចសហប្រតិបត្តិការមេគង្គក្នុងក្របខណ្ឌគណៈកម្មាធិការជាតិទន្លេមេគង្គកម្ពុជា(CNMC) និងគណៈកម្មការទន្លេមេគង្គ (MRC) នៅសាលប្រជុំនៃសណ្ឋាគារសោម៉ាទេវីអង្គរ ក្រុងសៀមរាប និងមានការចូលរួមពីតំណាងមន្ត្រីថ្នាក់ជាតិនៃក្រសួងស្ថាប័នពាក់ព័ន្ធជាសមាជិកសរុបចំនួន 25 រូប ។ សិក្ខាសាលានេះប្រារព្ធឡើងក្នុងគោលបំណងសំខាន់ៗ គឺទី១- ជម្រាបជូនអំពីទិសដៅរបស់ MRC សម្រាប់ពេលអនាគតតាមរយៈការបង្ហាញជូននូវ ឯកសារយុទ្ធសាស្ត្រអភិវឌ្ឍន៍អាងមេគង្គឆ្នាំ២០១៦-២០២០ (Basin Development Strategy) ផែនការយុទ្ធសាស្ត្ររបស់ MRC ឆ្នាំ២០១៦-២០២០ និងការកែទម្រង់រចនាសម្ព័ន្ធស្ថាប័ន MRC ។ ទី២- ចែករំលែកការយល់ដឹងអំពីការលើកកម្ពស់យន្តការសម្របសម្រួលនិងកិច្ចសហប្រតិបត្តិការរវាងគណៈកម្មាធិការជាតិទន្លេមេគង្គជាមួយក្រសួង-ស្ថាប័ន ជាសមាជិកក្នុងក្របខណ្ឌ MRC និងទី៣- ចែករំលែកនិងផ្លាស់ប្តូរបទពិសោធន៍ក្នុងការអនុវត្តកិច្ចព្រមព្រៀងមេគង្គឆ្នាំ១៩៩៥ និងបណ្តានីតិវិធី គោលការណ៍ណែនាំបច្ចេកទេស ព្រមទាំងយុទ្ធសាស្ត្រកម្មវិធីនានារបស់ MRC ។
សិក្ខាកាម បានយល់ដឹបន្ថែមពីសារៈសំខាន់នៃកិច្ចសហប្រតិបត្តិការរបស់ប្រទេសជាសមាជិកគណៈកម្មការទន្លេមេគង្គ (កម្ពុជា ឡាវ ថៃ និងវៀតណាម) ដែលបានអនុវត្តតាមកិច្ចព្រមព្រៀងមេគង្គ ឆ្នាំ១៩៩៥ ដើម្បីលើកកម្ពស់ " កិច្ចសហប្រតិបត្តិការលើគ្រប់វិស័យនៃការប្រើប្រាស់ប្រកបដោយនិរន្តរភាព ការគ្រប់គ្រង និងការអភិរក្សធនធានទឹក និងធនធានដែលពាក់ព័ន្ឋក្នុងអាងទន្លេមេគង្គ " ព្រមទាំងទាំងពិភាក្សាផ្លាស់ប្តូរបទពិសោធន៍ពីកិច្ចប្រឹងប្រែង ក្នុងការអនុវត្តកិច្ចព្រមព្រៀង មេគង្គឆ្នាំ១៩៩៥ និងបណ្តានីតិវិធី គោលការណ៍ណែនាំបច្ចេកទេស យុទ្ធសាស្ត្រកម្មវិធីនានា និងទិសដៅអនាគតរបស់គណៈកម្មការទន្លេមេគង្គ តាមរយៈយុទ្ធសាស្ត្រអភិវឌ្ឍន៍អាង ផែនការយុទ្ធសាស្ត្ររបស់គណៈកម្មការទន្លេមេគង្គសម្រាប់ឆ្នាំ ២០១៦-២០២០ ។
