សកម្មភាពការចុះសិក្សាពីការបង្ករបង្កើនផលដំណាំស្រូវប្រាំង (ស្រូវដើមរដូវវស្សា)ក្នុងតំបន់ 1 និងតំបន់ 2 ក្នុងខេត្តបាត់ដំបង
នាថ្ងៃទី 03 ដល់ថ្ងៃទី 05 ខែ មិថុនា ឆ្នាំ 2015 ឯកឧត្តម មាស អឿន ទីប្រឹក្សាអាជ្ញាធរទន្លេសាប បានដឹកនាំមន្ត្រីបច្ចេកទេស ចុះសិក្សាពីការបង្ករបង្កើនផលដំណាំស្រូវប្រាំង (ស្រូវដើមរដូវវស្សា) សម្រាប់ចងក្រងជាព័ត៌មានផ្នែកដំណាំកសិកម្ម តំបន់ជុំវិញបឹងទន្លេសាប នៅក្នុងតំបន់ 1 និងតំបន់ 2 នៃខេត្តបាត់ដំបង ។ ការចុះសិក្សានេះ គឺមានគោលបំណងដើម្បី ប្រមូលទិន្នន័យបរិមាណផ្ទៃដីបង្ករបង្កើនផល ប្រភេទពូជ វិធីសាស្ត្រ និងបច្ចេកទេសដាំដុះ សត្វល្អិត និងជំងឺបំផ្លាញ ការប្រើប្រាស់ជី និងថ្នាំពុល ប្រភពទឹកស្រោចស្រព ការវិភាគប្រភេទដី (Soil Texture) និងការយកសំណាកដីធ្វើពិសោធន៍ (គុណភាពដី) ។ ក្នុងដំណើរការចុះសិក្សានេះ ក្រុមការងារបានជួបប្រជុំជាមួយអាជ្ញាធរភូមិ-ឃុំ/ស្រុក និងធ្វើសម្ភាសន៍ជាមួយប្រជាកសិករ ព្រមទាំងជីកដីដើម្បីពិនិត្យមើលប្រភេទដី (Soil Texture) ការពិពណ៌នាអំពីប្រូហ្វីលដី និងយកសំណាកដីធ្វើពិសោធន៍ ។
