ការអញ្ជីញចូលរួមកិច្ចប្រជុំក្រុមការងារ នៃកម្មវិធី “Mekong Water Dialogues (MWD)”
នាថ្ងៃទី ១៩ ខែធ្នូ ឆ្នាំ ២០១៤ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប បានអញ្ជើញចូលរួមកិច្ចប្រជុំក្រុមការងារ នៃកម្មវិធី Mekong Water Dialogues (MWD) ដែលរៀបចំដោយ អង្គការ International Union for Conservation of Nature (IUCN) ប្រចាំប្រទេសកម្ពុជា នៅទីរួមខេត្តសៀមរាប។ សមាសភាពចូលរួមក្នុងកិច្ចប្រជុំខាងលើនេះ គឺជាសមាជិកសមាជិកានៃក្រុមការងារដែលអញ្ជើញមកពីស្ថាប័នពាក់ព័ន្ធនានាដូចជា ក្រសួងបរិស្ថាន ក្រសួងកសិកម្ម រុក្ខាប្រម៉ាញ់ និងនេសាទ រដ្ឋបាលជលផល អាជ្ញាធរទន្លេសាប អង្គការម្លប់បៃតង អង្គការ NGO Forum និងសហគមន៍អភិរក្សធនធានធម្មជាតិខេត្តពោធិ៍សាត់ និងខេត្តស្ទឹងត្រែង។ ក្រុមការងារបានបង្ហាញជូននូវកម្រងឯកសារវីដេអូដែលបានថត ស្តីពី សកម្មភាពរបស់ក្រុមការងារដែលបានអនុវត្តនាពេលកន្លងមក លើការងារការគ្រប់គ្រងតំបន់ដីសើម និងជីវភាពរស់នៅរបស់ប្រជាជននៅតំបន់បឹងទន្លេឆ្មា (Video Documentary on Wetland Management and Livelihoods in Boeung Chhmar Ramsar Site) និងបានបន្តពិភាក្សាអំពីដំណើរការនៃការបំពេញការងារកន្លងមកនៃកម្មវិធី MWD ដែលបាន រៀបចំកិច្ចប្រជុំក្នុង និងក្រៅប្រទេសនាពេលកន្លងមក ការបង្កើតវគ្គបណ្តុះបណ្តាលផ្សេងៗជូនដល់មន្ត្រីពាក់ព័ន្ធនានា និងជាចុងក្រោយក្រុមការងារបានពិភាក្សា អំពីយុទ្ធសាស្ត្រនិរន្តរភាពនៃផែនការសកម្មភាពបន្ត។
