ការចុះសិក្សាស្រាវជ្រាវវាយតម្លៃការធ្វើដំណាំស្រូវប្រដេញទឹក (ស្រូវប្រាំង) ក្នុងតំបន់ 1 និងតំបន់ 2 ក្នុងខេត្តបន្ទាយមានជ័យ
ចាប់ពីថ្ងៃទី 15 ដល់ថ្ងៃទី 18 ខែ ធ្នូ ឆ្នាំ 2014 ឯកឧត្តម មាស អឿន ទីប្រឹក្សា អាជ្ញាធរទន្លេសាប បានដឹកនាំមន្ត្រីបច្ចេកទេស របស់អាជ្ញាធរទន្លេសាប បន្តចុះសិក្សាស្រាវជ្រាវ វាយតម្លៃ ការធ្វើដំណាំស្រូវប្រដេញទឹក (ស្រូវប្រាំង) សម្រាប់ចងក្រងជាព័ត៌មានផ្នែកដំណាំកសិកម្ម នៅក្នុងតំបន់ 1 និងតំបន់ 2 ក្នុងភូមិសាស្ត្រខេត្តបន្ទាយមានជ័យ ។ ការចុះសិក្សាស្រាវជ្រាវនេះ គឺមានគោលបំណង ដើម្បីឲ្យដឹងពីប្រភេទពូជដំណាំស្រូវ វិធីសាស្ត្រដាំដុះ សត្វល្អិត ជំងឺបំផ្លាញ ទីផ្សារ ផលិតផល ការដឹកជញ្ជូន សេដ្ចកិច្ចសង្គមកសិករ ការប្រើប្រាស់ជី ថ្នាំពុល បញ្ហាប្រឈម ក្នុងដំណើរការដាំដុះ ដំណោះស្រាយ ប្រភពទឹកស្រោចស្រព និងប្រភេទដី ។ ក្នុងដំណើរការ នេះក្រុមការងារបានជួបជាមួយអាជ្ញាធរភូមិ-ឃុំ/ស្រុក និងធ្វើសម្ភាសន៍ជាមួយប្រជាកសិករ ធ្វើស្រូវប្រដេញទឹក (ស្រូវប្រាំង) ព្រមទាំងជីកដីដើម្បីពិនិត្យមើលប្រភេទដី (Soil Texture) ការពិពណ៌នាអំពី ប្រូហ្វីលដី និងការយកសំណាកដីធ្វើពិសោធន៍ ។
