ឯកឧត្ដម ហ៊ែល តូនី អនុប្រធានក្តាប់រួម បានចុះត្រួតពិនិត្យស្ថានីយ៍កម្ពស់ទឹក-តម្រងទឹកភ្លៀង ស្ថិតក្នុងភូមិសាស្ត្រឃុំពាមបាង ស្រុកស្ទោង ខេត្តកំពង់ធំ
ក្រោមការដឹកនាំ និងចង្អុលបង្ហាញដ៏ខ្ពង់ខ្ពស់ ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទោង នាថ្ងៃសុក្រ ៩រោច ខែមាឃ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២១ ខែកុម្ភៈ ឆ្នាំ ២០២៥ ឯកឧត្ដម ហ៊ែល តូនី អនុប្រធានក្តាប់រួម និងលោក ឡុក សីលា ប្រធាននាយកដ្ឋានរដ្ឋបាល ផែនការ និងសហប្រតិបត្តិការ អមដោយក្រុមការងារមន្ត្រីបច្ចេកស្រាវជ្រាវបែបវិទ្យាសាស្ត្រវ័យក្មេងដែលដឹកនាំសម្របសម្រួលដោយលោកបណ្ឌិត អ៊ុក សុវណ្ណារ៉ា ជំនួយការផ្ទាល់របស់ឯកឧត្ដមអនុប្រធានក្តាប់រួមអាជ្ញាធរទន្លេសាប បានចុះត្រួតពិនិត្យស្ថានីយ៍កម្ពស់ទឹក-តម្រងទឹកភ្លៀង និងប្រមូលសំណាកទឹកតាមទីតាំងសំខាន់ៗ ដើម្បីធ្វើការវិភាគលក្ខណៈរូបគីមី និងជីវៈនៃប៉ារ៉ាម៉ែត្រគុណភាពទឹកបឹងទន្លេសាប និងបឹងទន្លេឆ្មារ ស្ថិតក្នុងភូមិសាស្ត្រឃុំពាមបាង ស្រុកស្ទោង ខេត្តកំពង់ធំ ។ ជាមួយនឹងសកម្មភាពស្រាវជ្រាវនេះផងដែរ ឯកឧត្តម ក៏បានជួបប្រជុំពិភាក្សាជាមួយអាជ្ញាធរមូលដ្ឋានឃុំ និងភូមិ អំពីបទល្មើស ការចូលរួមការពារទប់ស្កាត់ធនធានធម្មជាតិ ការទ្រទ្រង់ជីវភាពរស់នៅ និងភូមិ-ឃុំមានសុវត្ថិភាពរបស់ប្រជាពលរដ្ឋទាំង៥ ភូមិ ក្នុងឃុំពាមបាង៕
