វគ្គបណ្តុះបណ្តាលង្រឹងសមត្ថភាពលើកទី 2 ដល់ក្រុមការងារគណៈកម្មការប្រតិបត្តិអាងស្ទឹងសែន
ថ្ងៃ សុក្រ ៧ កើត ខែ ចេត្រ នព្វស័ក ពស ២៥៧១ ត្រូវនឹងថ្ងៃទី ២៣ ខែមីនា ឆ្នាំ២០១៨ នៅសាលប្រជុំសាលាខេត្តកំពង់ធំ ឯកឧត្តមសាស្ត្រាចារ្យ លឹម ពុយ អនុប្រធានអាជ្ញាធរទន្លេសាប និងជាប្រធានក្រុមការងារគម្រោងគ្រប់គ្រងធនធានទឹកចម្រុះ នៃអាងស្ទឹងសែន បានដឹកនាំ និងរៀបចំវគ្គបណ្តុះបណ្តាលពង្រឹងសមត្ថភាពលើកទី 2 ដល់ក្រុមការងារគណៈកម្មការប្រតិបត្តិអាងស្ទឹងសែន រួមមាន ៖ ក្រុមការងារសហគមន៍កសិករប្រើប្រាស់ទឹក និងធារាសាស្ត្រកសិកម្មខេត្តកំពង់ធំ និងខេត្តព្រះវិហារ ។ វគ្គនេះ មានគោលបំណងផ្សព្វផ្សាយការយល់ដឹងពីនីតិវិធីក្នុងការបង្កើតសហគមន៍កសិករប្រើប្រាស់ទឹក កិច្ចដំណើរការ និងការថែទាំប្រព័ន្ធធារាសាស្ត្រ និងតម្រូវការទឹក ការប្រើប្រាស់ពូជស្រូវ ការប្រើប្រាស់ជី និងថ្នាំសម្លាប់សត្វល្អិតក្នុងដំណាំស្រូវ បន្លែ និងកិច្ចដំណើរការការងាររបស់បណ្តាញកសិករ។ វគ្គបណ្តុះបណ្តាលនេះ បានអញ្ជើញចូលរួមជាវាគ្មិនមកពីក្រសួងធនធានទឹក និងឧតុនិយម វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា អគ្គនាយកដ្ឋានកសិកម្ម និងក្រុមហ៊ុនថ្នាំសម្លាប់សត្វល្អិត DuPont ដែលមានសិក្ខាកាមចូលរួមសរុប 40 នាក់ ក្នុងនោះស្រី 7 នាក់។
