សកម្មភាពចូលរូមសិក្ខាសាលាស្តីពីការពិនិត្យផែនការយុទ្ធសាស្ត្រថវិកាជាតិតាមកម្មវិធី
កាលពីថ្ងៃទី ១៨-១៩ ខែកញ្ញា ឆ្នាំ២០១៤នេះ នៅសណ្ឋាគារ Ree Hotel ខេត្តសៀមរាប លោក ហឿង ឆេងហ៊ាង ប្រធានការិយាល័យហិរញ្ញវត្ថុក នាយកដ្ឋានរដ្ឋបាល ផែនការ និងសហប្រតិបត្តិការ នៃអាជ្ញាធរទន្លេសាប បានចូលរូម សិក្ខាសាលាស្តីពីការពិនិត្យផែន ការយុទ្ធសាស្ត្រថវិកាសម្រាប់គាំទ្រការរៀបចំថវិកាឆ្នាំ២០១៥ និងត្រៀមលក្ខណៈអនុវត្តថវិកាតាមកម្មវិធីពេញលេញនៅឆ្នាំ ២០១៦ (Reviewing of BSP for Support the Preparing 2015 Budget, and Ready of Full Program Budgeting Carrying Out by 2016 of the MOWRAM) ដែលរៀបចំដោយក្រសួងធនធានទឹក និងឧតុនិយមដោយមានការឧបត្ថម្ភគាំទ្រថវិកា និងបច្ចេកទេសពីធនាគារអភិវិឌ្ឍន៍អាស៊ី (ADB Grant No. TA-222-CAM) សម្រាប់ ការងារកែទម្រង់ការគ្រប់គ្រងហិរញ្ញវត្ថុសាធារណៈក្នុងក្រសួងធនធានទឹក និងឧតុនិយម ក្រោមអធិបតីភាពឯកឧត្តម ក្រោមអធិបតីភាពរបស់ លោក ជង សេងអ៊ីម អគ្គនាយករងកិច្ចការរដ្ឋបាល នៃក្រសួងធនធានទឹក និងឧតុនិយម ។ សិក្ខាសាលានេះ ផ្តោតលើប្រធានបទ ២ គឺការពិនិត្យផែនការយុទ្ធសាស្ត្រថវិកាសម្រាប់គាំទ្រការរៀបចំថវិកាឆ្នាំ២០១៥ និងការត្រៀមលក្ខណៈអនុវត្តថវិកាតាមកម្មវិធីពេញលេញនៅឆ្នាំខាងមុខតាមការកំណត់របស់ក្រសួងសេដ្ឋកិច្ច និងហិរញ្ញវត្ថុ។
ផែនការយុទ្ធសាស្ត្រថវិកា ត្រូវបានរៀបចំឡើងតាំងពីឆ្នាំ២០០៧ ដោយកំណត់រយៈពេល ៣ឆ្នាំនិងធ្វើការរំកិលជា រៀងរាល់ឆ្នាំ។ ក្រសួងធ.ទ.ឧ បានលើកផែនការយុទ្ធសាស្ត្រថវិកាឆ្នាំ ២០១៥ -២០១៧ ដោយបានកំណត់គោល នយោបាយតែ០១ គឺការគ្រប់គ្រងអភិវឌ្ឍន៍ និងអភិរក្សធនធានទឹកប្រកបដោយប្រសិទ្ធភាព សមធម៌ និងនិរន្តរភាព និងមានយុទ្ធសាស្ត្រអាទិភាពចំនួន ០៥ គឺ៖
១. ការគ្រប់គ្រង និងអភិវឌ្ឍន៍ធនធានទឹក និងការអនុវត្តអនុត្តរភាពប្រព័ន្ធធារាសាស្ត្រ
២. ការគ្រប់គ្រងទឹកជំនន់ និងគ្រោះរាំងស្ងួត
៣. ការជម្រុញរៀបចំសេចក្តីព្រាងអនុក្រឹត្យ បទបញាត្តិសម្រាប់និរន្តរភាពទឹក
៤. ការគ្រប់គ្រងពត៌មានស្តីពី ធនធានទឹក និងឧតុនិយម
៥. ការកែលម្អគ្រប់គ្រងរដ្ឋបាល និងការអភិវឌ្ឍន៍ធនធានមនុស្ស
ផែនការយុទ្ធសាស្ត្រថវិកាឆ្នាំ២០១៥-២០១៧ ត្រូវបានប្រជុំពិភាក្សាជាមួយក្រសួងសេដ្ឋកិច្ចនិងហិរញ្ញវត្ថុ កំរិតជំនាញ ដោយមានការចូលរួមពីស្ថាប័ន នាយកដ្ឋានជំនាញ ពិសេសការចូលរួមរបស់មន្ទីររាជធានី-ខេត្ត ។ ទាំងកំរិតជំនាញ និងកំរិតប្រធានស្ថាប័ន ផែនការយុទ្ធសាស្ត្រថវិកា ត្រូវបានក្រសួងសេដ្ឋកិច្ច និងហិរញ្ញវត្ថុផ្តល់ជាអនុសាសន៍ និងសំណូមពរកែលម្អមួយចំនួន។ កត្តានេះហើយដែលអង្គសិក្ខាសាលានាពេលនេះ ត្រូវបានលើកយកមកធ្វើបច្ចុប្បន្នភាពឡើងវិញ ដើម្បីពង្រីកចំណុចខ្លាំង និងកែលម្អចំណុចខ្វះខាត។
