សកម្មភាពកិច្ចប្រជុំគម្រោងការគ្រប់គ្រងធនធានទឹកចម្រុះនៃអាងស្ទឹងសែន
ថ្ងៃព្រហស្បតិ៍ ១២ រោច ដល់ថ្ងៃសុក្រ ១៣ រោច ខែពិសាខ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី 30 ដល់ថ្ងៃទី 31 ខែឧសភា ឆ្នាំ 2019 ក្រុមការងារគម្រោងការគ្រប់គ្រងធនធានទឹកចម្រុះនៃអាងស្ទឹងសែន ដឹកនាំដោយ ឯកឧត្តម លឹម ពុយ អនុប្រធានអាជ្ញាធរទន្លេសាប និងជាប្រធានក្រុមការងារគម្រោង បានដឹកនាំអង្គប្រជុំការងារអនុវត្តន៍គម្រោង ដែលប្រព្រឹត្តទៅនៅសាលាឃុំរក្សា ស្រុករវៀង និងនៅសាលាស្រុកជ័យសែន ខេត្តព្រះវិហារ ដែលមានវត្តមានលោកអនុប្រធានមន្ទីរធនធានទឹក និងឧតុនិយមខេត្តព្រះវិហារ លោកអភិបាលស្រុក, មេឃុំទាំង 2 និងមេភូមិចំណុះនៃឃុំទាំង 2 ព្រមទាំងអង្គការ AREED និងអង្គការ Rain Water Cambodia ដែលភ្នាក់ងារទឹកបារាំង Rhine-Meuse ប្រគល់អោយអនុវត្តការងារសាងសង់ស្ថានីយផលិតទឹកស្អាតសរុបចំនួន 30 រូប ។ កិច្ចប្រជុំនីមួយៗផ្តោតលើ៖ (i) ផ្តល់អនុសាសន៍ និងការណែនាំលើគោលបំណង និងភារកិច្ចនៃការបង្កើតគណៈកម្មការគ្រប់គ្រងស្ថានីយផលិតទឹកស្អាតនៅឃុំទាំង 2 ខាងលើដើម្បីអោយស្ថានីយបានប្រើប្រាស់ដោយមាននិរន្តរភាព, (ii) ពិភាក្សា និងការជ្រើសរើសទីតាំងកន្លែងរៀបចំកម្មវិធីសម្ពោធដាក់ឲ្យប្រើប្រាស់ជាផ្លូវការនូវស្ថានីយផលិតទឹកស្អាតឃុំរក្សា និងឃុំពុទ្រា ដែលនឹងប្រព្រិត្តទៅនៅថ្ងៃទី 12 និងថ្ងៃទី 13 ខែមិថុនា ឆ្នាំ 2019 ខាងមុខនេះ ដោយមានវត្តមានគណៈប្រតិភូភ្នាក់ងារទឹកបារាំង Rhine-Meuse។
