ការអញ្ជើញចូលរួមរបស់ថ្នាក់ដឹកនាំអាជ្ញាធរទន្លេសាបក្នុងវេទិកាសាធារណៈ នៅខេត្តបន្ទាយមានជ័យ
នាថ្ងៃទី ៣០ ខែមិថុនា ឆ្នាំ២០១៥ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប និងជាសមាជិកក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ បានអញ្ជើញចូលរួមកម្មវិធីវេទិកា សាធារណៈនៅឃុំចំណោម ស្រុកមង្គលបូរី ខេត្តបន្ទាយមានជ័យ ក្រោមអធិបតីភាព ឯកឧត្តម សន ស៊ីថន រដ្ឋលេខាធិការក្រសួងភេនការ និងជាប្រធានក្រុមការងារ។ វេទិកានេះមានការអញ្ជើញចូលរួមពីសំណាកសមាជិកសមាជិកានៃក្រុមការងារថ្នាក់ជាតិ តំណាងមន្ទីរស្ថាប័ន អាជ្ញាធរមូលដ្ឋានភូមិ ឃុំ ស្រុក ក្រុមប្រឹក្សា តំណាងសហគមន៍ និងប្រជាពលរដ្ឋ ជាច្រើន។ ក្រោយពីបានស្តាប់របាយការណ៍របស់លោកមេឃុំចំណោម ស្តីពីស្ថានភាពទូទៅនៅក្នុងឃុំរួចមក ឯកឧត្តមប្រធានអង្គប្រជុំ បានជូនវេទិកាដល់បងប្អូនប្រជាពលរដ្ឋគ្រប់មជ្ឈដ្ឋាន ដើម្បីលើកឡើងអំពីបញ្ហាប្រឈម ក័ដូចជាសំណូមពរផ្សេងៗ ដែលទាក់ទងស្ថានភាពរស់នៅ ហេដ្ឋារចនាសម្ព័ន្ធ ភូមិ ឃុំ និងការប្រកបរបរកសិកម្មជាដើម។ ក្រោយពីបញ្ចប់វេទិកា ក្រុមការងារក៍បានចុះទៅពិនិត្យផ្ទាល់នូវសំណង់ទ្វាទឹកដែលជាគម្រោងថ្នាក់ជាតិ របស់ក្រសួងធនធានទឹក និងឧតុនិយមដែលបានស្ថាបនារួចរាល់នាឆ្នាំកន្លងទៅ នៅឃុំចំណោម និងឃុំសឿ។
