ការអញ្ជើញចូលរួមកិច្ចប្រជុំស្តីពីបណ្តាញឋបនីយជីវមណ្ឌលអាស៊ីអាគ្នេយ៍
ចាប់ពីថ្ងៃទី ១៥ ដល់ទី ១៩ ខែធ្នូ ឆ្នាំ២០១៤ ឯកឧត្តម ហ៊ែល តូនី អគ្គលេខាធិការ អាជ្ញាធរទន្លេសាប អមដំណើរជាមួយដោយលោក ណុំ សោភារិទិ្ធ ប្រធានការិយាល័យសម្របសម្រួលវិវាទ បានអញ្ជើញចូលរួមកិច្ចប្រជុំរួមគ្នារវាងកិច្ចប្រជុំលើកទី៨ ស្តីពីបណ្តាញឋបនីយជីវមណ្ឌលអាស៊ីអគ្នេយ៍ និងកិច្ចប្រជុំលើកទី២ ស្តីពីយុទ្ធសាស្ត្រនៃបណ្តាញឋបនីយជីវមណ្ឌលអាស៊ីប៉ាស៊ីហ្វិច និងសិក្ខាសាលា ស្តីពីការពង្រឹងសមត្ថភាពសម្រាប់ការគ្រប់គ្រងឋបនីយជីវមណ្ឌល និងតំបន់ការពារធម្មជាតិ ។ កិច្ចប្រជុំ និងសិក្ខាសាលានេះត្រូវបានរៀបចំដោយក្រសួងបរិស្ថាន សហការជាមួយអង្គការ UNESCO និងដៃគូអភិវឌ្ឍន៍ នៅសណ្ឋាគារ អប្សរាអង្គរ (APSARA ANGKOR Hotel) ក្រោមអធិបតីភាពដ៍ខ្ពង់ខ្ពស់របស់ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងមានការចូលរួមពីតំណាងក្រសួង ស្ថាប័នពាក់ព័ន្ធ និងអង្គការជាតិ និងអន្តរជាតិ មកពីបណ្តាប្រទេសនៃបណ្តាញឋបនីយជីវមណ្ឌលអាស៊ីប៉ាស៊ីហ្វិច រួមមានប្រទេសកូរ៉េ ចិន ឥណ្ឌូនេស៊ី ម៉ាឡេស៊ី ភូមា ហ្វីលីពីន ថៃ វៀតណាម ម៉ុងហ្គោលី រុស្ស៊ី ឥណ្ឌា អ៊ីរ៉ង់ កាហ្សាស្តង់ ណេប៉ាល់ និងអូស្ត្រាលី។ ។
គោលបំណងសំខាន់នៃកិច្ចប្រជុំគឺ ដើម្បីកំណត់តម្រូវការនៃឋបនីយជីវមណ្ឌល កំណត់អត្តសញ្ញាណតំបន់ការពារប្រព័ន្ធអេកូឡូស៊ី កំណត់តម្លៃនិងអត្ថប្រយោជន៍នៃហេតុប៉ះពាល់បរិស្ថាន សេដ្ឋកិច្ច សង្គម និងវប្បធម៌ នៅក្នុងតំបន់ឋបនីយជីវមណ្ឌល សំដៅប្រែក្លាយតំបន់ទាំងនោះឱ្យទៅជាគោលដៅអេកូទេសចរណ៍ និងតំបន់អភិវឌ្ឍន៍ប្រកបដោយនិរន្តរភាព ដើម្បីជាប្រយោជន៍ដល់ការរស់នៅរបស់ប្រជាសហគមន៍ក្នុងមូលដ្ឋាន និងដើម្បីចែករំលែកនូវបទពិសោធន៍ និងចំណេះដឹងអំពីឋបនីយជីវមណ្ឌលចូលរួមចំណែកក្នុងការកាត់បន្ថយភាពក្រីក្រតាម រយៈការផ្តល់សេវាកម្មនៃប្រព័ន្ធអេកូលូស៊ីរបស់វា និងវិធីសាស្ត្រនៃការចិញ្ចឹមជីវិតផ្សេងៗ ហើយចង់បង្ហាញថាតើ ទេសចរណ៍ធម្មជាតិ អាចត្រូវបានគេប្រើប្រាស់ដើម្បីជម្រុញ និងផ្តល់អំណាចឲ្យសហគមន៍មូលដ្ឋានចូលរួមក្នុងសកម្មភាពអភិវឌ្ឍន៍ប្រកប ដោយនិរន្តភាពយ៉ាងដូចម្តេចដែរ។
