ការអញ្ជើញចូលរួមវេទិកាសាធារណៈ ដើម្បីគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ ខេត្តបន្ទាយមានជ័យ
នាព្រឹកថ្ងៃទី ២៤ ខែវិច្ឆិកា ឆ្នាំ២០១៤ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប និងជាសមាជិកក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ បានអញ្ជើញចូលរួមក្នុងវេទិកាសាធារណៈនៅឃុំតាឡំ ស្រុកមង្គលបូរី ដើម្បីតាមដានការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ក្រោមអធិបតីភាព ឯកឧត្តម សន ស៊ីថន រដ្ឋលេខាធិការក្រសួងផែនការ និងជាប្រធានក្រុមការងារថ្នាក់ខេត្តចុះមូលដ្ឋានស្រុកមង្គលបូរី ក្នុងពីធីវេទិកាសាធារណៈនេះមានការអញ្ជើញចូលរួមពីសមាជិកសមាជិការនៃក្រុមការងារថ្នាក់ជាតិមកពីក្រសួងស្ថាប័នពាក់ព័ន្ធ ប្រជាពលរដ្ឋ គណៈកម្មការវត្ត សមាជិកក្រុមប្រឹក្សាឃុំ ភូមិ ចូលរួមជាច្រើននាក់។ ការរៀបចំកម្មវិធីវេទិកាសាធារណៈនេះគឺសំដៅប្រមូលព័ត៌មាន ក្តាប់សភាពការណ៍ទូទៅរបស់ប្រជាពលរដ្ឋ ស្តាប់ការបញ្ចេញមតិយោបល់ ក្តីកង្វល់ និងឆ្លើយតបទៅនឹងសំណួរ ឬមានវិធានការដោះស្រាយភ្លាមៗលើបញ្ហាប្រឈមណាដែលមានលក្ខណៈតូចៗ សម្រាប់បញ្ហាប្រឈមធំៗ ក្រុមការងារសហការជាមួយអាជ្ញាធរស្រុក ធ្វើរបាយកាណ៍ជូនថ្នាក់ដឹកនាំ និងស្ថាប័នក្រសួងពាក់ព័ន្ធ ដើម្បីពិនិត្យ និងសម្រេច។
ក្រោយពីបានស្តាប់របាយការណ៍របស់លោកជំទប់ទី ១ឃុំតាឡំរួមមក ឯកឧត្តមប្រធានអង្គប្រជុំ មានមតិសំណេះសំណាល និងបានបង្ហាញជូនអំពីលទ្ធផលការងាររបស់ក្រុមការងារដែលបានរៀបចំវេទិកាសាធារណៈនៅឃុំគយម៉ែង ឃុំបន្ទាយនាង ឃុំភ្នំតូច និងឃុំឬស្សីក្រោក នាពេលកន្លងមក។ ប្រជាពលរដ្ឋ ឃុំតាឡំ បានលើកបញ្ហាមួយដូចជា ផ្លូវលំមានការលំបាកក្នុងការធ្វើដំណើរ ដឹកផលិតផល និងពិបាកដល់សិស្សានុសិស្សធ្វើដំណើរទៅសាលារៀន សំណូមពរស្តារប្រព័ន្ធប្រឡាយ ការរៀបចំគណៈកម្មការវត្តព្រះស្រែ និងការអនុវត្តកម្មវិធីសុវត្ថិភាពភូមិ ឃុំ ជាដើម។
