នាថ្ងៃទី ០៤ ខែសីហា ឆ្នាំ២០១៤ នៅសាលាខេត្តបន្ទាយមានជ័យ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប និងជាសមាជិកក្រុមការងារថ្នាក់ជាតិចុះមូលដ្ឋានខេត្ត បន្ទាយមានជ័យ បានអញ្ជើញចូលរួមក្នុងកិច្ចប្រជុំលើកទី ១ បូកសរុបលទ្ធផលនៃការអនុវត្តត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ក្រោមអធិបតីភាពដ៏ខ្ពង់ខ្ពស់ ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ និងមានការអញ្ជើញចូលរួមពី ឯកឧត្តម គោស៊ុំ សារឿត អភិបាលនៃគណៈអភិបាលខេត្តបន្ទាយមានជ័យ ព្រមទាំងក្រុមការងារថ្នាក់ខេត្ត ស្រុក/ក្រុង ទាំងអស់ទូទាំងខេត្ត ។ ជាលទ្ធផល គិតចាប់តាំងពីការចុះអនុវត្តរបស់ក្រុមការងារថ្នាក់ជាតិរហូតមកដល់ ខែកក្កដា ឆ្នាំ២០១៤ នេះ ឃើញថា ក្រុមការងារបានចុះជួប និងប្រជុំវេទិកាសាធារណៈជាមួយប្រជាពលរដ្ឋ បានចំនួន ៥៥ លើក ដោយបានទទួលសំណូមពរ និងបញ្ហាប្រឈមរបស់បងប្អូនប្រជាពលរដ្ឋតាមបណ្តាភូមិ ឃុំ សង្កាត់ជាច្រើន ហើយបានដោះស្រាយរួចរាល់មួយចំនួននៅថ្នាក់ជាតិ និងមួយចំនួននៅថ្នាក់ខេត្ត។ ចំពោះករណីនៅសេសសល់ គឺបាននឹងកំពុងពិនិត្យដោះស្រាយបន្តបន្ទាប់ និងធ្វើរបាយការណ៍ជូនប្រមុខរាជរដ្ឋាភិបាល ដើម្បីជូនជ្រាប និងមានវិធានការបន្ត ។ ឯកឧត្តម ឧបនាយករដ្ឋមន្ត្រី បានដាក់ចេញនូវវិធានការ ១០ ចំនុចសំខាន់ៗ ដើម្បីពង្រឹងការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ពិសេសនៅក្នុងខេត្តបន្ទាយមានជ័យឲ្យ សម្រេចបានជោគជ័យ និងកាន់តែមានប្រសិទ្ធភាពខ្ពស់ ។