ការអញ្ជើញចូលរួមរបស់ថ្នាក់ដឹកនាំ ក្នុងកិច្ចប្រជុំថ្នាក់តំបន់លើកទី១៣ សម្រាប់ កម្មវិធីកសាងផែនការអភិវឌ្ឍន៍អាងទន្លេមេគង្គ
ក្រោមការសម្របសម្រួលថ្នាក់ជាតិរបស់គណៈកម្មាធិការជាតិទន្លេមេគង្គកម្ពុជាសម្រាប់កម្មវិធីផែនការ អភិវឌ្ឍន៍អាងទន្លេ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប និងជាសមាជិកក្រុមការងារអង្គភាពសម្របសម្រួលផែនការអភិវឌ្ឍន៍អាងទន្លេ បានចូលរួមកិច្ចប្រជុំថ្នាក់តំបន់លើកទី១៣ ដែលបានប្រព្រឹត្តទៅនាថ្ងៃទី ២៣-២៤ ខែកក្កដា ឆ្នាំ ២០១៤ នៅទីក្រុងបាងកក ប្រទេសថៃ ។ កិច្ចប្រជុំនេះ ធ្វើឡើងក្នុងគោលបំណងដើម្បីពិនិត្យ និងពិភាក្សាលើសេចក្តីព្រាងឯកសារបច្ចុប្បន្នភាពនៃយុទ្ធសាស្ត្រអភិវឌ្ឍន៍អាងទន្លេ (Basin Development Strategy-BDS) និងសេចក្តីព្រាងឯកសារទស្សនទាននៃការចែករំលែកផលប្រយោជន៍តំបន់ក្នុងអាងទន្លេមេគង្គ។ កិច្ចប្រជុំពិភាក្សាខាងលើនេះ គឺ មានការចូលរួមពីបណ្តាប្រទេសដែលជាសមាជិកគណៈកម្មការទន្លេមេគង្គ និងបានលើកយកលទ្ធផល ដែលសម្រេចបាននាពេលកន្លងមកនៃការអនុវត្តផែនការគ្រប់គ្រងអាងទន្លេឆ្នាំ ២០១១-២០១៥។
ជាលទ្ធផល អង្គប្រជុំពិភាក្សាបានធ្វើការប្រៀបធៀប និងធ្វើបច្ចុប្បន្នភាព នៃលទ្ធផលដែលបានអនុវត្តនាពេលកន្លងមក ដើម្បីជាមូលដ្ឋានឈានទៅដល់ការរៀបចំផែនការយុទ្ធសាស្ត្រអភិវឌ្ឍន៍ និងគ្រប់គ្រងអាងទន្លេមេគង្គសម្រាប់ឆ្នាំ ២០១៦-២០២០ នាពេលខាងមុខ។ កិច្ចប្រជុំក៍បានពិភាក្សាផងដែរអំពី ទស្សនទាន និងនីតិវិធីនៃការចែករំលែកផលប្រយោជន៍ក្នុងតំបន់អាងទន្លេមេគង្គ និងបានកំណត់នូវកិច្ចការដទៃទៀតដែលក្រុមការងារនឹងត្រូវអនុវត្តបន្ត។
