សកម្មភាពចុះសិក្សាស្រាវជ្រាវ និងវាយតម្លៃផលស្តុកត្រី
ចាប់ពីថ្ងៃទី ២៩ ដល់ ថ្ងៃទី៣០ ខែឧសភា ឆ្នាំ ២០១៤ ក្រុមការងារមន្ត្រីបច្ចេកទេស នៃនាយកដ្ឋានជំនាញរបស់អាជ្ញាធរទន្លេសាប ដឹកនាំដោយ ឯកឧត្តម សាស្ត្រាចារ្យ លឹម ពុយ អនុប្រធានអាជ្ញាធរ ទន្លេសាប បានចុះសិក្សាស្រាវជ្រាវ និងវាយតម្លៃផលស្តុកត្រី ក្នុងទីតាំងឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង និងឃុំផាត់ សណ្តាយ ស្រុកកំពង់ស្វាយ ខេត្តកំពង់ធំ ។ ក្រុមការងារ បានចុះពិនិត្យ និងវាយតម្លៃអំពីការនេសាទត្រី តាមបែបលក្ខណៈគ្រួសារ ដោយប្រើប្រាស់ឧបករណ៍មងរាយ មងបង្ក្រាប អួនអូសដៃ លបទម្លាក់ សំណាញ់ មងបណ្តែត អួនហ៊ុំ និងការអូសលៀសដោយប្រើទូកម៉ាស៊ីន នៅមុន រដូវបិទនេសាទ និងការចូលដល់រដូវវស្សាឆ្នាំ ២០១៤ ខាងមុខ ។
ក្នុងសកម្មភាពនៃការចុះសិក្សានេះ ក្រុមការងារ ក៏បានធ្វើការពិនិត្យ ដោយវាស់ប្រវែង និងថ្លឹងទម្ងន់ត្រីគ្រប់ប្រភេទ ដែលបានមកពីការនេសាទ និងបានវាស់ជម្រៅទឹកនៅតាមតំបន់មួយចំនួនដូចជា ៖ ដងស្ទឹងសែន បឹង-ព្រែក តាមមាត់ស្ទឹង និងបឹងទន្លេសាបស្ថិតក្បែរឡូត៍អភិរក្សបម្រុងលេខ ២ មាត់ព្រែកតាឳក និងភក់ ។
