សកម្មភាពចុះសិក្សាពីការប្រើប្រាស់ទឹកស្ទឹងសង្កែ និងស្ថានភាពសេដ្ឋកិច្ចគ្រួសារប្រជាកសិករ
ចាប់ពីថ្ងៃទី ០៧-១២ ខែមេសា ឆ្នាំ ២០១៤ ក្រុមការងារមន្ត្រីបច្ចេកទេស អាជ្ញាធរទន្លេសាប ដឹកនាំដោយ លោក វិន ប៊ុនពៅ អនុប្រធានក្តាប់រួម នៃនាយកដ្ឋានធនធានធម្មជាតិ បានចុះសិក្សាពីការប្រើប្រាស់ទឹកស្ទឹងសង្កែ សម្រាប់បម្រើការស្រោចស្រព និងស្ថានភាពសេដ្ឋកិច្ចគ្រួសាររបស់ប្រជាកសិករ ដើម្បីធ្វើបច្ចុប្បន្នភាពព័ត៌មាន-ទិន្នន័យផ្ទៃដីកសិកម្ម នៅតំបន់បឹងទន្លេសាប ក្នុងស្រុកឯកភ្នំ ខេត្តបាត់ដំបង ។ ការចុះសិក្សារបស់ក្រុមការងារ បានផ្តោតជាសំខាន់ៗទៅលើ (១) -តម្រូវការទឹកសម្រាប់បម្រើការស្រោចស្រពដំណាំ បូមចេញពីស្ទឹងសង្កែជាលក្ខណៈគ្រួសារ និងឧស្សាហកម្ម (២)-លទ្ធភាពនៃធនធានទឹកបម្រើដល់ការស្រោចស្រព (៣)-ស្ថានភាពសេដ្ឋកិច្ចគ្រួសារប្រជាកសិករ ។ ជាមួយនឹងសកម្មភាពនៃការចុះសិក្សានេះ ក្រុមការងារ បានធ្វើការសិក្សាទៅលើផ្ទៃដីស្រែ និងចំការស្ថិតក្នុងតំបន់ ១ តំបន់ ២ និងតំបន់ ៣ និងបានអនុវត្តតាមវិធីសាស្ត្រ ដូចជា ៖
- ស្រង់ទិន្នន័យអំពីការប្រើប្រាស់ និងរយៈពេល របស់ម៉ាស៊ីនបូមទឹក
- វាស់វែងជាក់ស្តែងពីជម្រៅទឹកស្ទឹងសង្កែ
- សម្ភាសន៍កសិករ ដែលបាន និងកំពុងតែប្រមូលផល
- សិក្សាពីទិដ្ឋភាពនៃស្រែប្រាំង ព្រមជាមួយនឹងបង្គោលព្រំការពារតំបន់ព្រៃលិចទឹក
