ការអញ្ជើញចូលរួមរបស់ថ្នាក់ដឹកនាំអាជ្ញាធរទន្លេសាប ក្នុងសិក្ខាសាលាថ្នាក់តំបន់ ស្តីពី យន្តការចែករំលែកផលប្រយោជន៍នៃកម្មវិធីនិរន្តរភាពវារីអគ្គសនី
ក្រោមការសម្របសម្រួលថ្នាក់ជាតិរបស់គណៈកម្មាធិការជាតិទន្លេមេគង្គកម្ពុជា សម្រាប់កម្មវធីនិរន្តរ ភាពវារីអគ្គសនី ឯកឧត្តម ខូវ មាស អគ្គលេខាធិការរង នៃអាជ្ញាធរទន្លេសាប និងជាសមាជិកថ្នាក់ជាតិ ត្រូវបានអញ្ជើញចូលរួមសិក្ខាសាលាថ្នាក់តំបន់ ស្តីពី យន្តការនៃចែករំលែកផលប្រយោជន៍ ស្ថិតក្រោមការរៀបចំ និងដឹកនាំដោយអគ្គលេខាធិការដ្ឋានគណៈកម្មការទន្លេមេគង្គ នៅទីក្រុងហូជីម៉ីញ ប្រទេសវៀតណាម នាថ្ងៃទី ១០-១១ ខែ មេសា ឆ្នាំ ២០១៤ ។ អង្គសិក្ខាសាលា បានផ្តោតសំខាន់ទៅលើគោលនយោបាយនៃការចែករំលែកផលប្រយោជន៍នៃវារីអគ្គសនីលើដៃទន្លេមេគង្គរួមគ្នា ក្នុងក្របខណ្ឌនៃប្រទេសដែលជាសមាជិក ។
នៅក្នុងទិដ្ឋភាពនៃអង្គសិក្ខាសាលា ប្រទេសទាំង ៤ (កម្ពុជា ថៃ ឡាវ និងវៀតណាម) បានលើកបង្ហាញពីសេចក្តីព្រាងនៃជម្រើស និងការវាយតម្លៃពីការចែករំលែកផលប្រយោជន៍គម្រោងវារីអគ្គសនីនៅលើដៃ ទន្លេមេគង្គរួមគ្នា និងបានពិភាក្សាអំពី Road Map សម្រាប់ការគាំទ្រនាថ្ងៃអនាគត ក្នុងកម្មវិធីចែករំលែករបស់ប្រទេសជាសមាជិក និងបានធ្វើការផ្លាស់ប្តូរបទពិសោធន៍មួយចំនួន អំពី ការអនុវត្តយន្តការនៃការចែករំលែកផលប្រយោជន៍នៃគម្រោងវារីអគ្គសនីរបស់ប្រទេសមួយចំនួននៅក្នុងតំបន់ និងពិភពលោក ដូចជា ប្រទេសចិន ប្រទេសនេប៉ាល់ ប្រទេសណកវេសន៍ ប្រទេសកាណាដា និងប្រទេសកូឡុំបី ។ល។
