លោក យ៉ាន់ សំរិទ្ធ ប្រធាននាយកដ្ឋាននីតិកម្ម និងផ្សព្វផ្សាយ បានដឹកនាំក្រុមការងារបន្តអនុវត្តសកម្មភាពសម្របសម្រួល និងតាមដានទំនាស់អត្ថប្រយោជន៍ពីការប្រើប្រាស់ធនធានធម្មជាតិ និងបរិស្ថាន នៅតំបន់បឹងទន្លេសាប ខេត្តកំពង់ឆ្នាំង
នាថ្ងៃចន្ទ ៤ កើត ខែកត្តិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី០៤ ខែវិច្ឆិកា ឆ្នាំ២០២៤ លោក យ៉ាន់ សំរិទ្ធ ប្រធាននាយកដ្ឋាន បានដឹកនាំក្រុមការងារមន្ត្រីបច្ចេកទេស នៃនាយកដ្ឋាននីតិកម្ម និងផ្សព្វផ្សាយ បន្តចុះអនុវត្តសកម្មភាពសម្របសម្រួល និងតាមដានទំនាស់អត្ថប្រយោជន៍ពីការប្រើប្រាស់ធនធានធម្មជាតិ ដោយបានធ្វើការជួបពិភាក្សាជាមួយតំណាងអង្គភាពជំនាញពាក់ព័ន្ធ រដ្ឋបាលស្រុករលាប្អៀរ អាជ្ញាធរមូលដ្ឋាន រួមនឹងសហគមន៍នេសាទកោះកែវ ស្ថិតនៅក្នុងភូមិសាស្ត្រឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
សូមជម្រាបជូនថា ការសិក្សានេះ បានឃើញថាបច្ចុប្បន្នសម្ពាធនៃកំណើនប្រជាជន និងភាពក្រីក្ររបស់ប្រជាជនក្នុងតំបន់ជាប់នឹងបឹងទន្លេសាប បាន និងកំពុងជះឥទ្ធិពលមកលើធនធានធម្មជាតិបឹងទន្លេសាប បង្កឡើងនូវទំនាស់/វិវាទផលប្រយោជន៍ ក្នុងនោះរួមមាន សកម្មភាពលបលួចទន្ទ្រានដែនព្រៃលិចទឹក និងព្រៃលិចទឹក (ដីតំបន់២) តាមរូបភាពដុតរកសត្វ ការដណ្ដើមទឹកស្រោចស្រពលើវិស័យកសិកម្ម ដែលលើសផែនការ និងការផ្គត់ផ្គង់ទឹក ព្រមទាំងការប្រើប្រាស់ថ្នាំបំពុលសត្វល្អិត និងជីគីមីកសិកម្មគ្មានស្ដង់ដារបច្ចេកទេសត្រឹមត្រូវ រួមនឹងការចោលកាកសំណល់ (សម្បកថ្នាំ/ជីគីមី) ចូលក្នុងប្រភពទឹក ពាលវាលពាសកាល និងសកម្មភាពការប្រើប្រាស់នូវប្រភេទឧបករណ៍នេសាទខុសច្បាប់ជាដើម ដែលជាកត្តាបង្កឱ្យមានផលប៉ះពាល់យ៉ាងធ្ងន់ធ្ងរដល់ធនធានធម្មជាតិ និងព្រៃលិចទឹកក្នុងភូមិសាស្ត្រឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
សូមបញ្ជាក់ជូនថាៈ សកម្មភាពសម្របសម្រួល និងតាមដានទំនាស់អត្ថប្រយោជន៍ពីការប្រើប្រាស់ធនធានធម្មជាតិ និងបរិស្ថាននៅតំបន់បឹងទន្លេសាប និងតំបន់ពាក់ព័ន្ធ ដើម្បីជួបពិភាក្សា និងប្រមូលទិន្នន័យ-ព័ត៌មាន និងផ្សព្វផ្សាយបញ្ជ្រាបខ្លឹមសារអនុក្រឹត្យលេខ ៨៣ (ការកំណត់ និងសិទ្ធិអាស្រ័យផលដីតំបន់២) ក្នុងគោលបំណងបង្កើនកិច្ចសហការល្អ រវាងស្ថាប័នជំនាញពាក់ព័ន្ធ និងការយល់ដឹងពីដំណើរការនៃការតាមដានត្រួតពិនិត្យ និងវាយតម្លៃពីផលប៉ះពាល់ធនធានធម្មជាតិ រួមទាំងការចែករំលែកនូវទិន្ន័យ-ព័ត៌មានទាន់ហេតុការណ៍ ដែលកើតមានឡើងក្នុងតំបន់ជុំវិញបឹងទន្លេសាប ព្រមទាំងវិធីសាស្ត្រក្នុងការដោះស្រាយវិវាទផលប្រយោជន៍ពីការទាញយកធនធានធម្មជាតិ នៅកម្រិតថ្នាក់ជាតិ និងថ្នាក់ក្រោមជាតិ សម្រាប់ភាពជោគជ័យក្នុងកិច្ចការពារ និងគ្រប់គ្រងធនធានធម្មជាតិនៅតំបន់បឹងទន្លេសាប ប្រកបដោយចីរភាព ៕
