កិច្ចប្រជុំពិភាក្សាអន្តរក្រសួង ជាមួយអាជ្ញាធរដែនដី និងមន្ទីរជំនាញក្នុងខេត្តពោធិ៍សាត់ ពីផែនការអនុវត្តគម្រោងអភិវឌ្ឍន៍តំបន់អភិរក្សពហុចម្រុះអេកូទេសចរណ៍សហគមន៍ ឃុំស្នាអន្សា ស្រុកក្រគរ ខេត្តពោធិ៍សាត់
សាលប្រជុំរដ្ឋបាលសាលាខេត្តពោធិ៍សាត់, នាព្រឹកថ្ងៃសុក្រ ១៥កើត ខែជេស្ឋ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២១ ខែមិថុនា ឆ្នាំ២០២៤ ឯកឧត្តម ហ៊ែល តូនី អនុប្រធានក្តាប់រួម អាជ្ញាធរទន្លេសាប អមដោយ ឯកឧត្តម ជា សុខនី អគ្គលេខាធិការរង តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប បានដឹកនាំប្រតិភូអន្តរក្រសួងស្ថាប័នជំនាញ រួមមាន : ក្រសួងរៀបចំដែនដី នគរូបនីយកម្ម និងសំណង់, ក្រសួងធនធានទឹក និងឧតុនិយម, ក្រសួងកសិកម្ម រុក្ខាប្រមាញ់ និងនេសាទ, ក្រសួងបរិស្ថាន, និងក្រសួងទេសចរណ៍ ប្រជុំពិភាក្សាជាមួយអាជ្ញាធរខេត្ត ស្រុក ឃុំ និងមន្ទីរជំនាញពាក់ព័ន្ធក្នុងខេត្តពោធិ៍សាត់ ដែលដឹកនាំដោយ ឯកឧត្តម ឡាយ វិសិដ្ឋ អភិបាលរង តំណាងឯកឧត្តមអភិបាលនៃគណ:អភិបាលខេត្តពោធិ៍សាត់ ដើម្បីស្វែងយល់ពីផែនការអនុវត្តគម្រោងអភិវឌ្ឍន៍តំបន់អភិរក្សពហុចម្រុះអេកូទេសចរណ៍សហគមន៍ ស្ថិតក្នុងភូមិសាស្ត្រឃុំស្នាអន្សា ស្រុកក្រគរ ខេត្តពោធិ៍សាត់ ។
សូមជម្រាបថា គម្រោងអភិវឌ្ឍន៍តំបន់អភិរក្សពហុចម្រុះអេកូទេសចរណ៍សហគមន៍ ក្នុងទីតាំងខាងលើ ត្រូវបានផ្តួចផ្តើមដោយប្រជាពលរដ្ឋ និងអាជ្ញាធរមូលដ្ឋានស្រុកក្រគរ នៅលើទំហំផ្ទៃដីសរុប ២៦៦៧,១៧ ហិកតា ស្ថិតក្នុងតំបន់២ និងតំបន់៣ នៃបឹងទន្លេសាប ក្នុងគោលបំណង : ១.ការពារនិងទប់ការលួចដុតទន្ទ្រានព្រៃលិចទឹក, ២.រក្សាជម្រកត្រីសត្វស្លាប និងជីវចម្រុះតំបន់បឹងទន្លេសាប, ៣.ជម្រុញសក្តានុពលអេកូទេសចរក្នុងការលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍ ។
បន្ទាប់ពីស្តាប់ការពន្យល់បង្ហាញ និងជជែកពិភាក្សាដោយយកចិត្តទុកដាក់ក្នុងស្មារតីការពារ និងទប់ស្កាត់ផលប៉ះពាល់បឹងទន្លេសាប ជាសម្បត្តិធនធានធម្មជាតិដ៏កម្រមិនអាចកាត់ថ្លៃបានជាពិសេសត្រូវចូលរួមអនុវត្តឱ្យមានប្រសិទ្ធភាពនូវបទបញ្ជាណែនាំដ៏ថ្លៃថ្លាបំផុតរបស់ សម្តេចធិបតី នាយករដ្ឋមន្ត្រី ត្រូវយកចិត្តទុកដាក់ការពារ ថែរក្សា និងគ្រប់គ្រងតំបន់បឹងទន្លេសាបប្រកបដោយមានចីរភាព និងនិរន្តរភាព សម្រាប់អាយុជីវិតប្រទេសជាតិ និងបន្តអោយអ្នកជំនាន់ក្រោយ ។ អង្គប្រជុំ ក៏បានស្នើអោយអាជ្ញាធរដែនដីខេត្ត ស្រុក និងឃុំ ធ្វើការសហការសិក្សា ពិនិត្យពិចារណាឡើងវិញ ជាពិសេសលើរាល់ច្បាប់ និងបទដ្ឋានគតិយុត្តិដែលមានស្រាប់ និងត្រូវឱ្យមានការពិភាក្សាឱ្យបានល្អិតល្អន់ជាមួយមន្ទីរជំនាញជុំវិញខេត្តដែលជាសេនាធិការផ្ទាល់នៅថ្នាក់ក្រោមជាតិឱ្យក្រសួងស្ថាប័នជំនាញថ្នាក់ជាតិ ។
សូមបញ្ជាក់ថា តំបន់បឹងទន្លេសាប ត្រូវបានបែងចែកជា ៣ តំបន់ :
-តំបន់១ ជាតំបន់លំនៅដ្ឋាន ឬភូមិករ និងជាតំបន់បង្កបង្កើនផលរបស់ប្រជាពលរដ្ឋ ដែលទទួលបានសិទ្ធិកាន់កាប់ស្របច្បាប់ (ប័ណ្ណកម្មសិទ្ធិ)
-តំបន់២ ជាតំបន់ប្រើប្រាស់អាស្រ័យផល ស្រូវឡើងទឹកនិងប្រដេញទឹក និងក៏ជាតំបន់ទ្រនាប់ការពារ
-តំបន់៣ តំបន់ព្រៃលិចទឹក ហាមប៉ះពាល់ដាច់ខាត និងត្រូវការពារអោយខាងតែបាន៕
