ការអញ្ជើញចូលរួមរបស់ថ្នាក់ដឹកនាំអាជ្ញាធរទន្លេសាប ក្នុងកិច្ចប្រជុំក្រុមការងារបច្ចេកទេសថ្នាក់តំបន់លើកទី ១២ ប្រទេសវៀតណាម
ក្រោមការសម្របសម្រួលថ្នាក់ជាតិរបស់គណៈកម្មាធិការជាតិទន្លេមេគង្គកម្ពុជា សម្រាប់កម្មវិធីកសាងផែនការអភិវឌ្ឍអាង ឯកឧត្តម ហ៊ែល តូនី អគ្គលេខាធិការ នៃអាជ្ញាធរទន្លេសាប និងជាសមាជិកអង្គភាពសម្របសម្រួលផែនការអភិវឌ្ឍអាងទន្លេមេគង្គ ត្រូវបានអញ្ជើញចូលរួមកិច្ចប្រជុំក្រុមការងារបច្ចេកទេសថ្នាក់តំបន់លើកទី១២ ស្ថិតក្រោមការរៀបចំ និងដឹកនាំដោយលេខាធិការដ្ឋាន នៃគណៈកម្មការទន្លេមេគង្គអន្តរជាតិ នៅទីក្រុងហាណូយ ប្រទេសវៀតណាម ចាប់ពីថ្ងៃទី ២៧-២៨ ខែមីនា ឆ្នាំ ២០១៤ ។ កិច្ចប្រជុំក្រុមការងារបច្ចេកទេសថ្នាក់តំបន់លើកទី ១២ គឺផ្តោតទៅលើការពិភាក្សាអំពីទស្សនៈវិស័យថ្នាក់ជាតិ និងថ្នាក់តំបន់ ក្នុងការធ្វើបច្ចុប្បន្នភាពយុទ្ធសាស្ត្រអភិវឌ្ឍអាង Basin Development Strategy (២០១៦-២០២០) និងការត្រួតពិនិត្យឡើងវិញពីបទពិសោធន៍ជាអន្តរជាតិក្នុងកិច្ចសហប្រតិបត្តិការតំបន់ និងការចែករំលែកផលប្រយោជន៍ ដើម្បីជំរុញនូវរបៀបវារៈនៃកិច្ចសហប្រតិបត្តិការ ក្នុងការចូលរួមការអភិវឌ្ឍប្រកបដោយចិរភាព (Sustainable Development) រួមជាមួយនឹងកិច្ចការពារអាងទន្លេមេគង្គ តាមរយៈការសម្របសម្រួលរបស់ក្រុមជំនាញការឯករាជ្យ សម្រាប់កម្មវិធីកសាងផែនការអភិវឌ្ឍអាង និងធ្វើការពិនិត្យទៅលើអភិក្រម និងវិធីសាស្ត្រ នៃការវាយតម្លៃពីការបែងចែកផលប្រយោជន៍នាពេលបច្ចុប្បន្ន និងអនាគតក្នុងអាងទន្លេមេគង្គ ។
