ទិដ្ឋភាព ឃុំកំពង់លួង ស្រុកក្រគរ ខេត្តពោធិ៍សាត់ នៅរដូវវស្សា ថ្ងៃទី៥ ខែតុលា ឆ្នាំ ២០២៣
ឃុំកំពង់លួង ជាឃុំមួយក្នុងចំណោមឃុំទាំង ១១ របស់ស្រុកក្រគរ ខេត្តពោធិ៍សាត់ ស្ថិតនៅភាគខាងជើងនៃស្រុកក្រគរ និងមានចម្ងាយប្រមាណជា ៦ គីឡូម៉ែត្រពីទីរួមស្រុក ដែលមានព្រំប្រទល់ខាងត្បូងជាប់នឹងឃុំអន្លង់ត្នោត និងឃុំក្បាលត្រាច ខាងលិចជាប់នឹងឃុំអន្លង់ត្នោត ខាងកើតជាប់នឹងឃុំក្បាលត្រាច និងខាងជើងជាប់នឹងពាក់កណ្តាលបឹងទន្លេសាប ខេត្តកំពង់ធំ ដែលមានផ្ទៃដីសរុបចំនួន ៤,២០០ហ.ត។ ឃុំកំពង់លួង មាន ០៥ភូមិ ដែល ០៤ភូមិ ជាភូមិបណ្តែតទឹក គឺភូមិទី១ ទី២ ទី៣ និងភូមិទី៥ ចំណែកភូមិទី៤ ជាភូមិនៅលើដីគោក ដូច្នេះផ្ទះប្រជាពលរដ្ឋនៅក្នុងឃុំភាគច្រើនជាប្រភេទផ្ទះផែបណ្តែតទឹក (ផ្ទះបណ្តែតទឹក)។ ជីវភាពប្រជាពលរដ្ឋក្នុងឃុំចំនួនប្រមាណជា ៥០% ពឹងផ្អែកទៅលើរបរនេសាទ ជាចម្បង និងផ្នែកសេវាកម្មប្រមាណ ២៥% មានដូចជា អាជីវកម្មទិញត្រី លក់ដូរគ្រឿងទេស និងអ្នកដឹកភ្ញៀវ ៣% ចិញ្ចឹមត្រី ១០%, ធ្វើស្រែចំការ ៧% និងសប្បកម្ម ៥% ។
