លោក យ៉ាន់ សំរិទ្ធ ប្រធាននាយកដ្ឋាននីតិកម្ម និងផ្សព្វផ្សាយ បានបន្តចុះសិក្សាពីប្រសិទ្ធភាពលើការអនុវត្ត និងយន្តការគន្លឹះក្នុងការកសាងផែនការគ្រប់គ្រងសហគមន៍នេសាទប្រកបដោយនិរន្តរភាព ខេត្តពោធិ៍សាត់
ខេត្តពោធិ៍សាត់: ថ្ងៃអង្គារ ១២រោច ខែស្រាពណ៍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី ១២ ខែកញ្ញា ឆ្នាំ២០២៣ ក្រុមការងារមន្ត្រីនាយកដ្ឋាននីតិកម្ម និងផ្សព្វផ្សាយ នៃអគ្គលេខាធិការដ្ឋាន អាជ្ញាធរទន្លេសាប ដឹកនាំដោយ លោក យ៉ាន់ សំរិទ្ធ ប្រធាននាយកដ្ឋាននីតិកម្ម និងផ្សព្វផ្សាយ បានបន្តចុះអនុវត្តសកម្មភាពសិក្សាពីប្រសិទ្ធភាពលើការអនុវត្ត និងយន្តការគន្លឹះក្នុងការកសាងផែនការគ្រប់គ្រងសហគមន៍នេសាទប្រកបដោយនិរន្តរភាព។
ការចុះសិក្សានេះ ក្រុមការងារបានចុះ ៖
ទី ១/. ជួបពិភាក្សាជាមួយអាជ្ញាធរ ដែនដី ឃុំរាំងទិល និងឃុំស្រែស្តុក
ទី ២/. ជួបពិភាក្សាជាមួយសហគមន៍នេសាទកោះព្រែករាំងទិល ក្នុងឃុំរាំងទិល និងសហគមន៍នេសាទចំរេះ ក្នុងឃុំស្រែស្តុក ។
# ជាមួយនឹងសកម្មភាពក្រុមការងារចុះសិក្សានៅតំបន់ពាក់ព័ន្ធខាងលើ ជាលទ្ធផលឃើញថា ៖
ទី១/. ស្ថានភាពទូទៅសហគមន៍នេសាទកោះព្រែករាំងទិល ដែលបង្កើតឆ្នាំ២០០១ មានសមាជិកគណៈកម្មការសរុបចំនួន ១១នាក់ (ស្រី ១នាក់) ។ សហគមន៍នេះ មានដំណើរការងារជាប្រចាំថ្ងៃ ដោយអនុវត្តទៅតាមផែនការគ្រប់គ្រងកន្លែងនេសាទសហគមន៍កោះព្រែករាំងទិល ក្រោមជំនួយគាំទ្រទាំងបច្ចេកទេស សម្ភារៈ និងថវិកា ពីអង្គការ (WCS, CI និង Rico) និងខណ្ឌជលផល។
ទី២/. ស្ថានភាពទូទៅសហគមន៍នេសាទចំរេះ ចាប់ផ្តើមដំណើរការនៅឆ្នាំ២០០៨ ដែលមានសមាជិកគណៈកម្មការសរុបចំនួន ១១នាក់ (ស្រី ១នាក់) ដោយមានការជួយគាំទ្រពីអង្គការហៅកាត់ថា អកអ (បានបណ្តុះបណ្តាលដល់គណៈកម្មការពីការងារគ្រប់គ្រងសហគមន៍) និងជំនួយពី ADB (ការងារចុះល្បាត សម្ភារៈ និងបោះបង្គោលព្រំតំបន់អភិរក្សចំរេះ ទំហំ ២១ហ.ត) រយៈពេល ០៣ឆ្នាំកន្លងមក។
ទី៣/បច្ចុប្បន្ន ពួកគេបានកំពុងជួបកង្វះនូវធនធានមនុស្ស ថវិកា សម្ភារៈ បច្ចេកទេស គាំទ្រដល់ដំណើរការងារប្រចាំថ្ងៃរបស់គណៈកម្មការសហគមន៍ និងថវិកា ក្នុងការអនុវត្តផែនការសកម្មភាពរបស់សហគមន៍នៅមានដែនកម្រិត។
# សូមជម្រាបជូនថាៈ សកម្មភាពចុះសិក្សាពីប្រសិទ្ធភាពលើការអនុវត្ត និងយន្តការគន្លឹះក្នុងការកសាងផែនការគ្រប់គ្រងសហគមន៍នេសាទប្រកបដោយនិរន្តរភាព ខាងលើនេះ មានគោលបំណងស្វែងយល់ :
- ១/.យន្តការគន្លឹះក្នុងការរៀបចំផែនការគ្រប់គ្រងសហគមន៍
- ២/. ប្រសិទ្ធភាពនៃការអនុវត្តផែនការគ្រប់គ្រងសហគមន៍នេសាទនៅតាមបណ្តាសហគមន៍នេសាទ និង
- ៣/. កិច្ចសហការ សម្របសម្រួល ជាមួយនឹងស្ថាប័នជំនាញ និងអ្នកពាក់ព័ន្ធ ក្នុងការគ្រប់គ្រងធនធានធម្មជាតិនៅតំបន់បឹងទន្លេសាប ។
