កិច្ចប្រជុំគណៈកម្មការពិគ្រោះយោបល់លើការអនុវត្តគម្រោងការគ្រប់គ្រង និងការប្រើប្រាស់ទឹក របស់ ប្រជាជនក្នុងសហគមន៍ជុំវិញបឹងទន្លេសាបៈ
អាជ្ញាធរទន្លេសាប បានសហការជាមួយអង្គការ WorldFish បានបើកកិច្ចប្រជុំពិគ្រោះយោបល់មួយស្តីពីការគ្រប់គ្រង និងប្រើប្រាស់ទឹករបស់ប្រជាជនដែលនៅក្នុងសហគមន៍ជុំវិញបឹងទន្លេសាប ក្រោមអធិបតីភាពឯកឧត្តមសាស្ត្រចារ្យ លឹម ពុយ អនុប្រធានអាជ្ញាធរទន្លេសាប ដោយមានការចូលរួមពីថ្នាក់ដឹកនាំរបស់អាជ្ញាធរទន្លេសាប ក្រុមការងារគម្រោងនៃអាជ្ញាធរទន្លេសាប អង្គការ WorldFish ប្រចាំប្រទេសកម្ពុជា តំណាងវិទ្យាស្ថានគ្រប់គ្រងទឹកអន្តរជាតិ (IWMI) តំណាងក្រសួងកិច្ចការនារី តំណាងក្រសួងធនធានទឹក និងឧតុនិយម រដ្ឋបាលជលផល និងសាកលវិទ្យាល័យភូមិន្ទកសិកម្ម ដែលបានប្រព្រឹត្តទៅនាព្រឹកថ្ងៃទី ២៧ ខែកុម្ភៈ ឆ្នាំ២០១៤ នៅទីស្តីការក្រសួងធនធានទឹក និងឧតុនិយម ។
កិច្ចប្រជុំមានគោលបំណងចង់បង្ហាញ អំពីវិធីសាស្ត្រនៃការចុះប្រមូលព័ត៌មាន និងលទ្ធផលនៃការសិក្សាទៅលើការប្រើប្រាស់ទឹកជាលក្ខណៈគ្រួសារ វិស័យកសិកម្ម ឧស្សាហកម្ម ប្រព័ន្ធស្រោចស្រព ការនេសាទ វារីវប្បកម្ម និងការចិញ្ចឹមសត្វជាដើម ដែលបានធ្វើការសិក្សាទៅលើតំបន់គោលដៅចំនួន ១២ ភូមិ ក្នុងឃុំទាំង ១២ នៃស្រុកទាំង៥ ក្នុងខេត្ត ៥ ជុំវិញបឹងទន្លេសាប ដោយកំណត់លក្ខណៈជាបីប្រភេទគឺ៖ ភូមិលើគោក ភូមិពាក់កណ្តាលគោកពាក់កណ្តាលទឹក និងភូមិលិចទឹក ។ ក្នុងនោះដែរ កិច្ចប្រជុំ ក៏បានធ្វើការពិភាក្សាទៅលើលទ្ធផលនៃការចុះសិក្សាស្រាវជ្រាវ ដើម្បីកំណត់នូវចំណុចអាទិភាព បញ្ហាប្រឈមផ្សេងៗ ដែលកើតមាននៅក្នុងសហគមន៍ និងកំណត់យុទ្ធសាស្ត្រមួយចំនួនសម្រាប់ដោះស្រាយ (Innovative Strategies)។
ជាលទ្ធផល អង្គប្រជុំ បានឯកភាពរាល់លទ្ធផលនៃរបកគំហើញ ដែលបានមកពីការចុះសិក្សាស្រាវជ្រាវ និងប្រមូលព័ត៌មាន ដោយមានកិច្ចសហការយ៉ាងល្អរវាងក្រុមការងារមន្ត្រីរបស់អាជ្ញាធរទន្លេសាប និងក្រុម ការងារអង្គការ WorldFish ដើម្បីយកទៅប្រើប្រាស់ក្នុងការរៀបចំនូវរបាយការណ៍លំអិត និងប្រើប្រាស់ជាមូលដ្ឋានក្នុងរៀបចំនូវផែនការ និងកម្មវិធី/គម្រោង ស្វែងរកកិច្ចសហ ប្រតិបត្តិការ ពីភាគីពាក់ព័ន្ធ និងដៃគូរអភិវឌ្ឍន៍នានា នៅក្នុងជំហានបន្ទាប់ ។
