ឯកឧត្តមសាស្ត្រាចារ្យ លឹម ពុយ អនុប្រធានអាជ្ញាធរទន្លេសាប ដឹកនាំមន្ត្រីបច្ចេកទេសចុះធ្វើការតាមដងទន្លេសាប និងបឹងទន្លេសាប
ថ្ងៃសុក្រ ១០ រោច ខែភទ្របទ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០១ ខែតុលា ឆ្នាំ ២០២១ ឯកឧត្តមសាស្ត្រាចារ្យ លឹម ពុយ អនុប្រធានអាជ្ញាធរទន្លេសាប បានដឹកនាំក្រុមការងារមន្ត្រីបច្ចេកទេស ចុះធ្វើការតាមដងទន្លេសាប និងតំបន់បឹងទន្លេសាប ចាប់ពីចំណុចភូមិសាស្ត្រ ឃុំកោះចិន ស្រុកពញាឮ ខេត្តកណ្តាល ឆ្ពោះទៅកាន់បឹងទន្លេសាប តាមទីតាំងសំខាន់ៗដូចជា តំបន់ឆ្នុកទ្រូ តំបន់ផាត់សណ្តាយ តំបន់កំពង់លួង តំបន់កោះក្អែក តំបន់ពាក់កន្ទេល តំបន់កំពង់ឃ្លាំង តំបន់មាត់ខ្លា និងតំបន់បឹងទន្លេឆ្មារ។ ក្នុងដំណើរបេសកកម្មនេះ មានគោលបំណងសំខាន់ៗដូចជា ៖
1-ពិនិត្យលើស្ថានភាព ទិដ្ឋភាពទូទៅនៅតំបន់ទន្លេសាប
2-តាមដានសកម្មភាពអាជីវកម្មនេសាទនៅរដូវបើកនេសាទ
3-សិក្សាលើធនធានជលផល (ត្រី ពស់ និងសិប្បីសត្វ) ដែលទឹកបឹងទន្លេសាប មានកម្ពស់ទឹក ៥ ម៉ែត្រ
4-ការលូតលាស់របស់ប្រភេទត្រីដែលប្រជាជនយកទៅកែច្នៃធ្វើប្រហុក
5-យកសំណាកទឹក និងវាស់វែងជម្រៅទឹកតាមទីតាំងសំខាន់ៗនៅតំបន់បឹងទន្លេសាប។
