ឯកឧត្តម ស៊ិន វិសិទ្ធ អគ្គលេខាធិការ ចុះធ្វើការប្រមូលព័ត៌មានទិន្នន័យជាក់ស្តែង ដើម្បីធ្វើបច្ចុប្បន្នភាពអំពីផ្ទៃដីព្រៃលិចទឹកតំបន់ ៣
ខេត្តកំពង់ធំៈ នៅថ្ងៃ សុក្រ ០៧កើត ដល់ថ្ងៃ ចន្ទ ១០កើត ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី ១៦ ដល់ថ្ងៃទី ១៩ ខែកក្កដា ឆ្នាំ ២០២១ ឯកឧត្តម ស៊ិន វិសិទ្ធ អគ្គលេខាធិការ នៃអាជ្ញាធរទន្លេសាប បានដឹកនាំក្រុមការងារបច្ចេកទេស ចុះតាមដានផលប៉ះពាល់ផ្ទាល់លើតំបន់ ៣ នៅក្នុងភូមិសាស្ត្រខេត្តកំពង់ធំ ។ ការចុះសិក្សានេះ ជាការធ្វើអធិការកិច្ច និងប្រមូលព័ត៌មានទិន្នន័យជាក់ស្តែង ដើម្បីធ្វើបច្ចុប្បន្នភាពអំពីផ្ទៃដីព្រៃលិចទឹកតំបន់ ៣ និងបង្គោលព្រំកំណត់តំបន់ ៣ សម្រាប់ការងារអភិរក្សព្រៃលិចទឹកនៅជុំវិញបឹងទន្លេសាប។ សម្រាប់ខេត្តកំពង់ធំមានផ្ទៃដីព្រៃលិចទឹកចំនួន ១៣២,០៨១ ហិកតា និងបង្គោលចំនួន ១៣២ បង្គោល (តាមអនុក្រឹត្យលេខ ១៩៧ ចុះថ្ងៃទី ២៩ ខែសីហា ឆ្នាំ ២០១១) ដោយឡែកបេសកកម្មនេះក្រុមការងារបានពិនិត្យដោយផ្ទាល់លើបង្គោលលេខ ៦៧៩, ៦៨០, ៦៨១, ៦៨២, ៧៦៤, ៧៦៥, ៧៦៦, ៧៦៧, ៧៩៦ និង ៧៩៧ ។
