ការចុះសិក្សាពីការប្រើប្រាស់ទឹក សម្រាប់បម្រើដល់ការស្រោចស្រព និងលក្ខណៈ សេដ្ឋកិច្ចគ្រួសាររបស់ប្រជាកសិករ នៅក្រុងស្ទឹងសែន និងស្រុកកំពង់ស្វាយ ខេត្តកំពង់ធំ
កាលពីថ្ងៃទី ១៧ ដល់ថ្ងៃទី ២២ ខែកុម្ភៈ ឆ្នាំ២០១៤ ក្រុមការងារមន្ត្រីជំនាញការិយាល័យកសិកម្មចម្រុះ ដឹកនាំដោយ លោក វិន ប៊ុនពៅ អនុប្រធានយកដ្ឋានក្តាប់រួម នៃនាយកដ្ឋានធនធានធម្មជាតិ បានចុះសិក្សាពីការប្រើប្រាស់ទឹកសម្រាប់បំរើការងារស្រោចស្រពស្រូវប្រដេញទឹក ឬស្រូវស្រែប្រាំង និងសេដ្ឋកិច្ចគ្រួសារកសិករក្នុងការធ្វើដំណាំស្រូវ រួមជាមួយនឹងដំណាំរួមផ្សំផ្សេងៗទៀតនៅក្នុងភូមិសាស្ត្រក្រុងស្ទឹងសែន និងស្រុកកំពង់ស្វាយ ខេត្តកំពង់ធំ ។
ការចុះសិក្សារបស់ក្រុមការងារ បានរកឃើញថា ការប្រើប្រាស់ម៉ាស៊ីនបូមទឹកទាញយកទឹកពីស្ទឹងសែនយ៉ាងច្រើនដើម្បីស្រោចស្រពស្រូវស្រែប្រាំងនៅតាមដងស្ទឹង មានជាលក្ខណៈគ្រួសារ និងជាលក្ខណៈសហគមន៍កសិករប្រើប្រាស់ទឹក ក្នុងនោះផងដែរ គឺមានប្រជាកសិករមួយចំនួនតូចទៀត បានទិញទឹកពីក្រុមហ៊ុនបូមទឹកលក់ ដើម្បីស្រោចស្រព ។
ក្រុមការងារ ក៏បានចុះសិក្សាស្វែងយល់យ៉ាងច្រើនពីការងារបង្កបង្កើនផល និងជីវភាពរស់នៅរបស់កសិករទាំងនោះ ព្រមទាំងបានចុះសិក្សាពីជំរៅទឹកស្ទឹងសែន ចាប់ពីតំបន់១ រហូតដល់ក្បែរតំបន់៣ និងបរិមាណទឹកបញ្ចូលស្រែនីមួយៗ ។
