សិក្ខាសាលាស្តីពីការផ្សព្វផ្សាយរបាយការណ៍បញ្ចប់នៃការសិក្សាស្វែងយល់អំពីអនាគតទន្លេសាប
កាលពីថ្ងៃទី ១៧ ខែកុម្ភៈ ឆ្នាំ២០១៤ អាជ្ញាធរទន្លេសាប បានរៀបចំសិក្ខាសាលាមួយស្តីពី ”ការផ្សព្វផ្សាយរបាយការណ៍បញ្ចប់នៃការសិក្សាស្វែងយល់អំពីអនាគតទន្លេសាប ” និង “ ផែនការសម្មភាពការងារ អគ្គលេខាធិការដ្ឋាន នៃអាជ្ញាធរ ទន្លេសាប ២០១៤-២០១៦ “ ក្រោមអធិបតីភាពឯកឧត្តម ហ៊ែល តូនី អគ្គលេខាធិការ តំណាងដ៍ខ្ពង់ខ្ពង់បំផុតរបស់ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ដែលបានប្រព្រឹត្តទៅនៅទីស្តីការក្រសួងធនធានទឹក និងឧតុនិយម (ក្បាលថ្នល់) ក្រោមការឧបត្ថម្ភថវិកាដោយ CPWF-Mekong Basin Development Challenge ។ សមាភាពអញ្ជើញចូលរួមក្នុងសិក្ខាសាលា មកពីក្រសួង ស្ថាប័ន វិទ្យាស្ថានសិក្សាស្រាវជ្រាវ សង្គមស៊ីវិល មន្ត្រីសាលាខេត្តទាំង ៨ ជុំវិញបឹងទន្លេសាប តំណាងទីប្រឹក្សាបច្ចេកទេសគម្រោង ADB និង UNESCO សរុប ចំនួន ៧៥ នាក់។
ឯកសាររបាយការណ៍បញ្ចប់នៃការសិក្សាស្វែងយល់អំពីអនាគតទន្លេសាបនេះ ជាសមិទ្ធផលចុងក្រោយនៃដំណើរការអនុវត្តគម្រោង ” ការសិក្សាស្រាវជ្រាវពីអនាគតទន្លេមេគង្គ ” ដែលបានធ្វើការសិក្សាចាប់តាំងពីឆ្នាំ ២០១០ ក្រោមការឧបត្ថម្ភមូលនិធិដោយ AusAID និង CSIRO ក្នុងភាពជាដៃគូជាមួយនឹង Alto University និង មានកិច្ចសហការជាមួយនឹងដៃគូសំខាន់ៗរបស់រាជរដ្ឋាភិបាល រួមមាន ៖ អាជ្ញាធរទន្លេសាប Tonle Sap Authority ឧត្តមក្រុមប្រឹក្សាសេដ្ឋកិច្ចជាតិ Supreme National Economic Council និង វិទ្យាស្ថានបច្ចេកវិទ្យាកម្ពុជា Institute of Technology of Cambodia។
ជាក់ស្តែង របាយការណ៍បញ្ចប់នៃការសិក្សាស្រាវជ្រាវស្វែងយល់អំពីអនាគតទន្លេសាប គឺជាតំបន់សិក្សាស្រាវជ្រាវមួយក្នុងចំណោមតំបន់ទាំង ៥ ដែលបានជ្រើសរើស ធ្វើជាករណីសិក្សាស្រាវជ្រាវរបស់គម្រោង សិក្សាស្រាវជ្រាវស្វែងយល់ពីអនាគតតំបន់ទន្លេមេគង្គ រួមមាន ៖ Yunnan (China), Nam Ngum (Lao, PDR), Noteast Thailand, Mekong Delta ( Viet Nam) និង Tonle Sap (Cambodia) ។ ការសិក្សាស្រាវជ្រាវនេះ បានផ្តោតសំខាន់ទៅលើអន្តរសេវាកម្មរវាងធនធានទឹក និងការទ្រង់ជីវភាពរស់នៅរបស់ប្រជាពលរដ្ឋ រួមនឹងការវិភាគលើផលប៉ះពាល់ពីការផលិតថាមពលអគ្គីសនី (វារីអគ្គីសនី) និងបម្រែបម្រួលអាកាសធាតុ ។
សិក្ខាសាលា ស្តីពី ការផ្សព្វផ្សាយនេះ គឺក្នុងគោលបំណង ៖
ទី១. ពង្រឹង និងលើកកម្ពស់ការយល់ដឹងដល់អ្នកពាក់ព័ន្ធ អំពីស្ថានភាពរបស់ទន្លេសាបនាបច្ចុប្បន្ន និងពេលអនាគត តាមរយៈនៃលទ្ធផលដែលបានមកពីការសិក្សាស្រាវជ្រាវ ដើម្បីចូលរួមការពារធនធានធម្មជាតិ និងជីវចម្រុះបឹងទន្លេសាប
ទី២. ប្រមូល និងចងក្រងរាល់មតិយោបល់ពីអ្នកពាក់ព័ន្ធ សម្រាប់កែលម្អ និងបច្ចុប្បន្នភាពរបាយការណ៍លទ្ធផលសិក្សាស្រាវជ្រាវឲ្យកាន់តែមានភាពសុក្រឹត្យ និងជាពិសេសសម្រាប់រាល់គម្រោងសិក្សាលើកក្រោយៗទៀត
ទី៣. ផ្សព្វផ្សាយពីផែនការសកម្មភាពការងារ របស់អគ្គលេខាធិការដ្ឋាននៃអាជ្ញាធរទន្លេសាប ក្នុងការស្វែងរកកិច្ចសហប្រតិបត្តិការទាំងជំនួយបច្ចេកទេស និងថវិកាពីក្រសួង ស្ថាប័ន វិទ្យាស្ថានស្រាវជ្រាវ អង្គការមិនមែនរដ្ឋាភិបាល និងដៃគូអភិវឌ្ឍន៍នានា។
