វគ្គផ្សព្វផ្សាយបង្កើនការយល់ដឹងស្ដីពីបទបញ្ញត្តិពាក់ព័ន្ធនឹងការគ្រប់គ្រងបរិស្ថានធនធានធម្មជាតិ
នាថ្ងៃព្រហស្បតិ៍ ៤ កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ០៦ ខែ មិថុនា ឆ្នាំ ២០១៩ នៅអគ្គលេខាធិការដ្ឋាន នៃអាជ្ញាធរទន្លេសាប ឯកឧត្តម សរ គឹមសាន្ត អគ្គលេខាធិការរង តំណាងដ៏ខ្ពង់ខ្ពង់ឯកឧត្តម រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានអញ្ជើញជាអធិបតីភាពបើកវគ្គផ្សព្វផ្សាយផ្សព្វផ្សាយបង្កើនការយល់ដឹងស្ដីពីបទបញ្ញត្តិពាក់ព័ន្ធនឹងការគ្រប់គ្រង បរិស្ថានធនធានធម្មជាតិ ដល់មន្ត្រីបច្ចេកទេសនៃនាយកដ្ឋានជំនាញក្រោមឱវាទអគ្គលេខាធិការដ្ឋាន។ វគ្គផ្សេព្វផ្សាយនេះ ដើម្បី (១) បង្កើនការយល់ដឹងកាន់តែទូលំទូលាយនូវច្បាប់ គោលនយោបាយរដ្ឋាភិបាល និងបទដ្ឋានគតិយុត្តនានាពាក់ព័ន្ធការគ្រប់គ្រង អភិរក្ស និងអភិវឌ្ឍន៍ធនធានធម្មជាតិ និង(២)ចែករំលែកបបទពិសោធន៍ពាក់ព័ន្ធនឹងការវាយតម្លៃប៉ាន់លើផលប៉ះពាល់បរិស្ថានជាទូទៅនៅប្រទេសកម្ពុជា (EIAs)។ ជាលទ្ធផល សិក្ខាកាម បានយល់ដឹងបន្ថែមលើ៖
១. ទទួលបាននូវការយល់ដឹងពីច្បាប់ គោលនយោបាយរដ្ឋាភិបាល និងបទបញ្ញត្តិពាក់ព័ន្ធនឹងការគ្រប់គ្រងបរិស្ថានធនធានធម្មជាតិ រួមមាន ច្បាប់ស្តីពីកិច្ចការពារបរិស្ថាន និងការគ្រប់គ្រងធនធានធម្មជាតិ ច្បាប់ស្តីពីតំបន់ការពារធម្មជាតិ និងបទបញ្ញតិ្តនានាពាក់ព័ន្ធនឹងការគ្រប់គ្រងតំបន់ការពារធម្មជាតិ និងនីតិវិធី តួនាទី ភារកិច្ច និងកាធ្វើប្រតិភូកម្មមុខងារ ទៅថ្នាក់ក្រោមជាតិដែលមានតំបន់ការពារធម្មជាតិ
២. ទទួលបាននូវចំណេះដឹង បទពិសោធន៍ថ្មីៗលើទិដ្ឋភាពទូទៅ និងការវាយតម្លៃផលប៉ះពាល់គ្រប់គ្រងបរិស្ថានធនធានធម្មជាតិជាទូទៅនៅប្រទេសកម្ពុជា (Overview of Environmental Impact Assessment and Practical Application on WIA in Cambodia) ដោយផ្តោតសំខាន់លើ (i) ទិដ្ឋភាពទូទៅនៃ EIA រួមមាន ខ្លឹមសារ គោលបំណង គុណតម្លៃស្នូល ដំណើរការ EIA និង (ii) ការអនុវត្តដំណើរ EIA នៅកម្ពុជា ដូចជា ទម្រង់ដំណើរការផ្លូវច្បាប់សំខាន់ៗនិងវិធីសាស្ត្រ EIA ការពិនិត្យរបាយការណ៍ EIA អ្នកពាក់ព័ន្ធ ហេតុប៉ះពាល់បរិស្ថានសង្គមនិងវិធានការកាត់បន្ថយ និងភាពចន្លោះប្រហោង និងគុណសម្បត្តិពីការធ្វើ EIA(GAP and Advantage EIA) ផងដែរ។
