សកម្មភាពបង្រៀនភ្នាក់ងារ អ.ទ.ស យកកូអ័រដោនេ នៅលើទូរស័ព្ទដោយមិនប្រើប្រាស់ប្រព័ន្ធអ៊ីនធឺណែត
ថ្ងៃ ចន្ទ ៣ កើត ដល់ថ្ងៃសុក្រ ៧ កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៦ ដល់ថ្ងៃទី១០ ខែឧសភា ឆ្នាំ២០១៩ ក្រុមការងារមន្ត្រីបច្ចេកទេសដឹកនាំដោយ លោក ណុំ សោភារិទ្ធិ ជាអនុប្រធាននាយកដ្ឋានត្រួតពិនិត្យការធ្វើអាជីវកម្ម និងអភិរក្ស និង លោក អ៊ុក បញ្ញារិទ្ធ ប្រធានការិយាល័យបុគ្គលិក និងបណ្តុះបណ្តាល នៃនាយកដ្ឋានរដ្ឋបាល ផែនការ និងសហប្រត្តិបត្តិការ បានចុះជួបជាមួយភ្នាក់ងារ អ.ទ.ស នៅខេត្តកំពង់ឆ្នាំង ខេត្តពោធិ៍សាត់ និងខេត្តកំពង់ធំ។
គោលបំណងសំខាន់ក្នុងការចុះជួបគឺ ៖
១. បង្រៀន និងបំពាក់កម្មវិធីស្វ័យប្រវត្តិ ចុចយកកូអ័រដោនេ នៅលើទូរស័ព្ទ ដោយមិនប្រើប្រាស់ប្រព័ន្ធអ៊ីនធឺណែត (Offline)
២. ណែនាំបន្ថែមពីរបៀបរាយការណ៍មកកាន់ក្រុមការងារទទួលបន្ទុកឲ្យមាន ភាពច្បាស់លាស់
៣. ចុះអនុវត្តផ្ទាល់នៅទីតាំងបទល្មើស
៤. ពិនិត្យសម្ភារៈ និងឧបករណ៍ប្រើប្រាស់របស់ភ្នាក់ងារ អ.ទ.ស ។
ជាលទ្ធផលសង្ខេបរួមមាន:
ក. បានបង្រៀន និងបំពាក់កម្មវិធីស្វ័យប្រវត្តិ ចុចយកកូអ័រដោនេ នៅលើទូរស័ព្ទដល់ភ្នាក់ងារ អ.ទ.ស ចំនួន ០៦ រូប
ខ. ភ្នាក់ងារទាំងអស់យល់ច្បាស់ពីរបៀបរាយការណ៍ជូនក្រុមការងារទទួលបន្ទុក
គ. ក្រុមការងារជាមួយភ្នាក់ងារបានចុះអនុវត្តផ្ទាល់ជាក់ស្តែងនៅទីតាំងមានបទល្មើស ។
