សកម្មភាពចុះសិក្សាតាមដានផលចាប់ធនធានជលផលឡូតិ៍ដាយតាមដងទន្លេសាប
នាថ្ងៃសុក្រ ២ កើត ខែកត្តិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០៩ ខែវិច្ឆិការ ឆ្នាំ ២០១៨ ក្រុមការងារមន្ត្រីបច្ចេកទេសអគ្គលេខាធិការដ្ឋាន នៃអាជ្ញាធរទន្លេសាប ដឹកនាំដោយលោក ស៊ិន វិសិទ្ធ ប្រធាននាយកដ្ឋានត្រួតពិនិត្យការធ្វើអាជីវកម្ម និងអភិរក្ស បានចុះអនុវត្តសកម្មភាពសិក្សាស្រាវជ្រាវនៅតាមឡូតិ៍ដាយនៅឆ្នាំសិក្សា ២០១៨-២០១៩ ស្ថិតនៅតាមបណ្តោយដងបឹងទន្លេសាបស្ថិតក្នុងដែនរដ្ឋបាលខេត្តកណ្តាល និងរាជធានីភ្នំពេញ ។ ការសិក្សា បានធ្វើការជ្រើសរើសឡូតិ៍ដាយត្រីសំខាន់ៗចំនួន ៥ គន្លង ដើម្បីតាមដានផលចាប់នារដូវបើកនេសាទ និងការតាមដានកត់ត្រាស្ថិតិប្រចាំឆ្នាំលើផលចាប់ ចំនួនប្រភេទត្រី ទំហំត្រី ភាពប្រឈមនៃធនធានជលផល តម្លៃទីផ្សាជាមួយជីវភាពរស់នៅប្រជាជន និងការផ្គត់ផ្គង់បំពេញតម្រូវការទីផ្សាររបស់ប្រជាជនយកទៅកែច្នៃធ្វើជាប្រហុក ផ្អក ត្រីឆ្អើជាដើម។
