អាជ្ញាធរទន្លេសាប ចុះពិនិត្យស្ថានភាពនៃការធ្វើអាជីវកម្មឡូត៍ដាយ នៅរាជធានីភ្នំពេញ និងខេត្តកណ្តាល
ក្រុមការងាររបស់អាជ្ញាធរទន្លេសាប ដឹកនាំដោយ ឯកឧត្តម លឹម ពុយ អនុប្រធានអាជ្ញាធរ ទន្លេសាប បានចុះពិនិត្យ សកម្មភាពនៃការ ធ្វើអាជីវកម្មរបស់ឡូត៍ដាយត្រីនៅ តាមដងទន្លេសាប និងស្ថានភាពត្រីដែលឡូត៍នេសាទចាប់បាន ក្នុរដូវនេសាទ ឆ្នាំ 2011-2012 នេះ។
តាមការពិនិត្យបានបង្ហាញថាត្រីឆ្នាំនេះមានបរិមាណកើនឡើងលើសពីឆ្នាំមុនៗគួរឲ្យកត់សម្គាល់ ជាទូរទៅរៀងរាល់ឆ្នាំត្រីប្រហុកចាប់ត្រូវពី ខ្នើតទី៨ ត្រូវនឹងថ្ងៃទី០១ ខែមករា ឆ្នាំ២០១២ ប៉ុនែ្តឆ្នាំនេះត្រីចាប់ផ្តើមត្រូវខ្លាំងតាំងពីខ្នើតទី៦ ត្រូវនឹងថ្ងៃទី៣០ ខែធ្នូ ឆ្នាំ២០១១ មកម្លេះ ។
ចំពោះឡូត៍ដាយមួយចំនួន ដូចជាឡូត៍លេខ១៥ ១៤ ១៣ នៅខេត្តកណ្តាល ការចាប់ត្រីប្រហុកនៅខ្នើតនេះមិនទាន់ចាប់អស់លទ្ធភាពនៅឡើយទេ ពោលគឺពេលខ្លះអ្នកនេសាទទម្លាក់ដាយជម្រៅតែ ១ទៅ៣ ម៉ែត្រប៉ុណ្ណោះព្រោះខ្លាចចាប់ត្រីបានច្រើនពេក ដែលបណ្តាលឲ្យមានទម្ងន់ធ្ងន់ដល់ដាច់ឧបករណ៍របស់គេ ។ ចំពោះទិន្នផលត្រីដែលឡូត៍នេសាទទទួលបានក្នុង កំឡុងពេលត្រីត្រូវនេះ គឺសម្រាប់ការលើកត្រីម្តងៗ ផលចាប់អតិបរិមា មានបរិមាណពី 500Kg ទៅ 1 តោន ហើយ ចំពោះទូកដឹកត្រីដែលមានចំណុះ 8-9 តោន គឺត្រូវបានចាប់ត្រីបំពេញតែត្រឹមរយៈពេល 30 នាទីប៉ណ្ណោះ។
ទន្ទឹមនឹងនោះក្រុមការងារក៍បានធ្វើការពិនិត្យនិងជួបសំភាសន៍ជាមួយប្រជានេសាទជាលក្ខណៈគ្រួសារ ដោយប្រើឧបករណ៍នេសាទមងរាយ ដាក់នៅតាមដងទន្លេសាបផងដែរ។ បើតាមសំដីអ្នកនេសាទបានឲ្យដឹងថា ពួកគាត់សប្បាយរីករាយយ៉ាងខ្លាំង ដោយត្រីឆ្នាំនេះមានភាពសំបូរជាងឆ្នាំទៅ ដោយក្នុងឆ្នាំនេះពួកគាត់អាចចាប់ ត្រីបានច្រើនសម្រាប់ធ្វើប្រហុក ផ្អក និងលក់ត្រីស្រស់ ទៅកាន់ទីផ្សារ ដែលធ្វើឲ្យពួកគាត់រកកម្រៃបានច្រើន។
គេសង្កេតឃើញថា ប្រជាពលរដ្ឋជាច្រើនគ្រួសារ មកពីខេត្តនានា នៅទូទាំងប្រទេស ដូចជា ខេត្តកណ្តាល កំពង់ឆ្នាំង កំពង់ស្ពឺ ព្រៃវែង និង ខេត្តតាកែវ បានប្រមូលផ្តុំគ្នា នៅតាមចំណុចទីតាំងឡូត៍នីមួយៗ តាមបណ្តោយទន្លេសាប ដើម្បីធ្វើប្រហុក ផ្អក ឲ្យបានទាន់ពេលវេលា នៅឆ្នាំនេះ ។
ប្រជាពលរដ្ឋមានការសប្បាយរីករាយ ហើយសូមអរគុណ ដល់ថ្នាក់ដឹកនាំប្រទេស ពិសេស សម្តេច តេជោនាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចបានព្យួរឡូតិ៍នេសាទ និងចេញបទបញ្ជាលេខ ០១ បប ដែលធ្វើឲ្យត្រីកើនឡើង។
ការកើនឡើងនូវទិន្នផលត្រីនេះ ត្រូវបានគេមើលឃើញ ដោយសារទឹកធំ និងចំណាត់ការយ៉ាងម៉ឺងម៉ាត់ របស់រាជរដ្ឋាភិបាលក្នុង ការបង្ក្រាបបទល្មើសនេសាទ នៅទូទាំងប្រទេស ជាពិសេស នៅខេត្តជុំវិញបឹងទន្លេសាប.
