នាថ្ងៃចន្ទ ៧កើត ដល់ថ្ងៃព្រហស្បតិ៍ ១០កើត ខែជេស្ឋ ឆ្នាំម្សាញ់ ពុទ្ធសករាជ ២៥៦៩ ត្រូវនឹងថ្ងៃទី២ ដល់ថ្ងៃទី៥ ខែមិថុនា ឆ្នាំ២០២៥ ក្រុមការងារបច្ចេកទេស ការិយាល័យអភិរក្ស និងការិយាល័យព័ត៌មានភូមិសាស្ត្រ និងផែនទី នៃនាយកដ្ឋានត្រួតពិនិត្យការធ្វើអាជីវកម្ម និងអភិរក្ស បានចុះបេសកកម្មរួមគ្នាសិក្សាប្រមូលចងក្រងទិន្នន័យ ព័ត៌មាន ដើម្បីរៀបចំធ្វើបច្ចុប្បន្នភាពផែនទីគោលតំបន់ទន្លេសាប និងការចុះសិក្សាស្វែងយល់លើកិច្ចការងារអភិរក្ស និងពិគ្រោះយោបល់ជាមួយសហគមន៍ ព្រមទាំងអ្នកពាក់ព័ន្ធនានា ដើម្បីអាចកំណត់វិភាគមុខងារលើកន្លែងអភិរក្សសហគមន៍ ស្តីក្រោមរហាលសួង(រាំងពេន៣ត) ស្ថិតក្នុងឃុំព្រែកហ្លួង ស្រុកឯកភ្នំ ខេត្តបាត់ដំបង។
ការចុះសិក្សានេះក្រុមការងារមានគោលបំណងគឺ៖
- ការចុះសិក្សាប្រមូលព័ត៌មាន ទិន្នន័យ ដើម្បីចងក្រងរៀបចំធ្វើផែនទីគោលតំបន់ទន្លេសាបនៃខេត្តទាំង៦ ជុំវិញបឹងទន្លេសាប ដោយផ្តោតសំខាន់លើការរៀបចំចងក្រងព័ត៌មាន ហេដ្ឋារចនាសម្ព័ន្ធ តំបន់អភិរក្ស ប្រជាសាស្ត្រ និងធនធានធម្មជាតិក្នុងកម្រិតឃុំ
- ស្វែងយល់ពីទស្សនវិស័យ និងផែនការគ្រប់គ្រង អភិរក្សធនធានជលផល ជីវចម្រុះ ព្រៃលិចទឹក និងប្រព័ន្ធអេកូឡូស៊ី នៅក្នុងកន្លែងអភិរក្សរាំងពេន៣ត
- ការចូលរួមអនុវត្តច្បាប់ និងបទដ្ឋានគតិយុត្ត ដែលមានស្រាប់នៅក្នុងការចូលរួមថែរក្សា ការពារ និងការគ្រប់គ្រង
- សក្តានុពល និងកាលានុវត្តភាពដែលផ្តល់ផលប្រយោជន៍ពីកន្លែងអភិរក្សទៅដល់ប្រជាជនដែលរស់នៅជុំវិញ និងតំបន់ពាក់ព័ន្ធ
- ភាពខ្លាំង ភាពខ្សោយ និងវិធានដោះស្រាយ រួមជាមួយតម្រូវការក្នុងវិធានការឆ្ពោះទៅការគ្រប់គ្រង និងអភិរក្ស ធនធានជលផល និងជីវចម្រុះនៅជុំវិញបឹងទន្លេសាបប្រកបដោយចីរភាព។
ក្រុមការងារបច្ចេកទេសអាជ្ញាធរទន្លេសាប បាននឹងកំពុងរៀបចំកសាងឯកសារបច្ចេកទេសរួមគ្នាដែលជាធាតុចូលយ៉ាងសំខាន់ដល់ការកសាងផែនការយុទ្ធសាស្ត្ររយៈពេលមធ្យម និងរយៈពេលវែងសម្រាប់តំបន់បឹងទន្លេសាប។
សូមបញ្ជាក់ថា តំបន់ជុំវិញបឹងទន្លេសាបគ្របដណ្តប់ក្នុងខេត្តចំនួន៦ រួមមានខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តកំពង់ធំ។ ក្នុងនេះដែរសហគមន៍នេសាទ និងតំបន់អភិរក្សជលផលគឺបានដើរតួនាទីយ៉ាងសំខាន់ ក្នុងការគ្រប់គ្រង អភិរក្ស និងអភិវឌ្ឍន៍តំបន់ទន្លេសាប។ តំបន់បឹងទន្លេសាបត្រូវបានបែងចែកជាបីតំបន់ ក្នុងនោះតំបន់១ ជាតំបន់លំនៅដ្ឋាន និងស្រែចំការរបស់ប្រជាពលរដ្ឋ ដែលទទួលបានកម្មសិទ្ធិស្របច្បាប់ ហើយតំបន់២ ជាតំបន់ប្រើប្រាស់អាស្រ័យផល និងរក្សាទុកជាតំបន់ទ្រនាប់ការពារ ជាតំបន់ប្រជាពលរដ្ឋធ្វើស្រែឡើងទឹក និងប្រដេញទឹក និងតំបន់ ៣ ជាតំបន់ដែនព្រៃលិចទឹកហាមឃាត់ដាច់ខាត៕
