នៅថ្ងៃសុក្រ ២រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣១ ខែកក្កដា ឆ្នាំ២០២៦ ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប បានដឹកនាំក្រុមការងារមន្ត្រីបច្ចេកទេសអាជ្ញាធរទន្លេសាប ដែលមានការចូលរួមពីអាជ្ញាធរដែនដីស្រុក ឃុំ ភូមិ សហគមន៍ មន្ទីរពាក់ព័ន្ធ និងកងកម្លាំង ប្រជុំផ្សព្វផ្សាយអំពីកិច្ចដំណើរការកំណត់និយាមកាសម្រាប់បោះបង្គោលព្រំតំបន់កាត់ឆ្វៀល ជំហានទី២ ស្ថិតនៅក្នុងភូមិសាស្ត្រស្រុកបាកាន និងផ្នែកខ្លះនៃស្រុកកណ្តៀងខេត្តពោធិ៍សាត់ ចំនួន ៦៥០បង្គោល បន្តពីជំហានទី១ ដែលបានបោះរួចចំនួន ៦៥០បង្គោល នៃផែនការសរុបដែលបានគ្រោងសម្រាប់ខេត្តពោធិ៍សាត់ក្នុងឆ្នាំ២០២៦ ចំនួន ១៣០០បង្គោល ។
ជាមួយគ្នានោះដែរ ក្រុមការងារក៏បានបន្តចុះអនុវត្តភារកិច្ច និងការណែនាំដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ពិនិត្យមើលស្ថានភាពព្រៃលិចទឹកក្នុងតំបន់៣ បន្ទាត់ព្រំតំបន់៣ ដែលត្រូវការពារ និងទីតាំងដែលប្រជាពលរដ្ឋបានជីកកាយស្តារប្រឡាយនៅ ចន្លោះបង្គោលព្រំតំបន់៣ លេខ 439-440 សម្រាប់រក្សាទឹកស្រោចស្រប់ស្រែក្នុងតំបន់២ក្បែរនោះ ដែលរាជរដ្ឋាភិបាលបានកាត់ឆ្វៀលជូនកន្លងមក ។
ជារួម ទោះមានស្រែពលរដ្ឋលយចូលហួសព្រំខ្លះ តែសមត្ថកិច្ចពាក់ព័ន្ធ កងកម្លាំង អាជ្ញាធរដែនដី បានយកចិត្តទុកដាក់ទប់ស្កាត់ ការបន្តចូលបំពានព្រៃលិចទឹក ហើយប្រជាពលរដ្ឋមានការយល់ដឹង និងបានប្តេជ្ញាសហការចូលរួមការពារ ថែរក្សា អភិរក្សធនធានធម្មជាតិបឹងទន្លេសាបឱ្យមាននិរន្តរភាពសម្រាប់កូនចៅតជំនាន់ ៕
