អនុវត្តតាមភារកិច្ចចំពោះមុខដែលឯកឧត្តមរដ្ឋមន្ត្រី ថោ ជេដ្ឋាប្រធានអាជ្ញាធរទន្លេសាប បានប្រគល់ជូន នាថ្ងៃអង្គារ ១០រោច ខែបុស្ស ឆ្នាំម្សាញ់សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៣ ខែមករា ឆ្នាំ២០២៦ ឯកឧត្តម ម៉ៅ ហាក់អនុប្រធានអាជ្ញាធរទន្លេសាប និងជាប្រធានក្រុមការងារបានបន្តដឹកនាំមន្ត្រីបច្ចេកទេសអគ្គលេខាធិការដ្ឋានអាជ្ញាធរទន្លេសាប ចុះត្រួតពិនិត្យវាយតម្លៃ និងថែទាំឧបករណ៍ស្ថានីយឧតុនិយម និងជលសាស្ត្រទទួលនិងបញ្ជូនទិន្នន័យស្វ័យប្រវត្តិ (AWS,HR) មានចំនួន ៤ស្ថានីយ លើ ៣ទីតាំងស្ថិតនៅក្នុងភូមិសាស្ត្រខេត្តកំពង់ធំ បាត់ដំបង និងខេត្តកំពង់ឆ្នាំង មានដូចខាងក្រោម៖
- ខេត្តកំពង់ធំ : ស្ថិតនៅក្នុងបឹងទន្លេសាប ឃុំពាមបាង ស្រុកស្ទោង មានស្ថានីយឧតុនិយម(AWS) ចំនួន១ទីតាំង
- ខេត្តបាត់ដំបង : ស្ថិតនៅចំណុចដងស្ទឹងសង្កែ ឃុំច្រាំងចោត ស្រុកបាណន់ មានស្ថានីយជលសាស្ត្រ HR ចំនួន ១ទីតាំង
- ខេត្តកំពង់ឆ្នាំង : ស្ថិតនៅក្នុងបឹងទន្លេសាប ឃុំឆ្នុកទ្រូ ស្រុកបរិបូរណ៌ មានស្ថានីយជលសាស្ត្រ (HR) និងស្ថានីយឧតុនិយម (AWS) ចំនួន ១ ទីតាំង។
សូមជម្រាបជូនថា អាជ្ញាធរទន្លេសាបក្រោមកិច្ចសហប្រតិបត្តិការជាមួយវិទ្យាស្ថានស្រាវជ្រាវជលសាស្ត្រ ណានជីង (Nanjing Hydraulic Research Institute-NHRI) និងវិទ្យាស្ថានស្រាវជ្រាវណានជីងផ្នែកជលសាស្ត្រនិងប្រព័ន្ធស្វ័យប្រវត្តិកម្មសម្រាប់ការអភិរក្ស (Nanjing ResearchInstitute Hydrology and Water Conservation Automation-NIHWA) បានអនុវត្តគម្រោងសាកល្បងបច្ចេកវិទ្យាតាមដានទទួល និងបញ្ជូនទិន្នន័យជលសាស្ត្រ-ឧតុនិយម និងអាកាសធាតុនៅក្នុងអាងបឹងទន្លេសាបដែលមាន ១១ ស្ថានីយ លើ ៨ ទីតាំង និងមាន Master Station នៅអាជ្ញាធរទន្លេសាប៕
