នាព្រឹកថ្ងៃចន្ទ ១០រោច ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៥ ខែធ្នូ ឆ្នាំ២០២៥ នៅសណ្ឋាគារឡឺរ៉ូយ៉ាល់ ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប តាមការអនុញ្ញាតដ៏ខ្ពង់ខ្ពស់ ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប បានដឹកនាំក្រុមការងារ អាជ្ញាធរទន្លេសាប អញ្ជើញចូលរួមពិភាក្សាក្នុងសិក្ខាសាលាស្តីពី អាកាសធាតុកាន់តែក្តៅ និងស្ងួតនៅលើទ្វីប ផ្តោតលើ ផលប៉ះពាល់ និងជម្រើសដំណោះស្រាយសម្រាប់ប្រទេសកម្ពុជា «Continental Drying: Implications and Options for Cambodia» ដោយមានចូលរួមពីក្រសួងស្ថាប័នពាក់ព័ន្ធ ដូចជា ក្រសួងធនធានទឹក និងឧតុនិយម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងសាធារណការ និងដឹកជញ្ជូន ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន គណៈកម្មាធិការជាតិទន្លេមេគង្គកម្ពុជា រួមទាំងដៃគូអភិវឌ្ឍន៍ និងអង្គការក្រៅរដ្ឋាភិបាលទាក់ទងនឹងវិស័យធនធានទឹក។
គោលបំណងនៃកិច្ចពិភាក្សាក្នុងសិក្ខាសាលានេះគឺ:
- ផ្សព្វផ្សាយលទ្ធផល នៃរបាយការណ៍សកលស្តីពីការថយចុះបរិមាណធនធានទឹក
- បង្កើតវេទិកាពិភាក្សា បង្កើនការយល់ដឹងប្រមូលធាតុចូលបន្ថែមអំពីគ្រោះរាំងស្ងួត និងការប្រែប្រួលអាកាសធាតុ
- ពង្រឹងកិច្ចសហប្រតិបត្តិការរវាងភាគីពាក់ព័ន្ធ ដើម្បីធានាបានសន្តិសុខទឹកសម្រាប់ប្រទេសកម្ពុជា។
ក្នុងសិក្ខាសាលានេះ ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប បានចូលរួមជាវាគ្មិនកិត្តិយស ក្នុងវេទិកាកិច្ចពិភាក្សារួម ជាមួយស្ថាប័នពាក់ព័ន្ធ ក្នុងការចែករំលែកទស្សនៈវិស័យ ព័ត៌មាន និងបទពិសោធន៍ក្នុងការគ្រប់គ្រងតំបន់អាងទន្លេសាប និងបឹងទន្លេសាបនាពេលបច្ចុប្បន្ន តាមរយៈការរៀបចំផែនការយុទ្ធសាស្ត្ររយៈពេលវែង មធ្យម និងខ្លី។ អាជ្ញាធរទន្លេសាបបាន និងកំពុងរៀបចំ របាយការណ៍លម្អិតពីអាងទន្លេសាប Tonle Sap State of Basin Report ជាមួយធនាគាពិភពលោក ដើម្បីពង្រឹងការគ្រប់គ្រងធនធានធម្មជាតិជីវចម្រុះប្រកបដោយប្រសិទ្ធភាព ដែលអាចឆ្លើយតបទៅនឹងការប្រែប្រួលអាកាសធាតុ។ ឯកឧត្តមបានគូសបញ្ជាក់ ពីការងារចំពោះមុខដែលអាជ្ញាធរទន្លេសាបបាន រៀបចំផែនការមេក្នុងការដាំស្តារព្រៃលិចឡើងវិញនៅជុំវិញតំបន់បឹងទន្លេសាប ដើម្បីរក្សាបាននូវតុល្យភាព និងផលប៉ះពាល់ដល់ជីវចម្រុះគ្រប់ប្រភេទនៃបឹងទន្លេសាប។
បឹងទន្លេសាប ជាប្រភពនៃជីវចម្រុះច្រើនសម្បូរបែប និងជាប្រព័ន្ធអេកូឡូស៊ីទឹកសាបដ៏សំខាន់នៅអាស៊ីអាគ្នេយ៍ កំពុងតែប្រឈមមុខនឹងការគំរាមកំហែងពីកត្តាមួយចំនួនដូចជា ១.បរិមាណ និងរយៈពេលទឹកស្តុកក្នុងអាងមានការធ្លាក់ចុះ ២.ការកើនឡើងនៃតម្រូវការទឹកស្រោចស្រព ៣.ប្រសិទ្ធភាពការប្រើប្រាស់ទឹក និងគុណភាពទឹក ៤. ហានិភ័យដោយការថយចុះនូវជីវចម្រុះ និងកម្រិតជីវភាពរស់នៅរបស់ប្រជាជន៕
