នាព្រឹកថ្ងៃសុក្រ ៨ រោច ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៨ ខែកក្កដា ឆ្នាំ២០២៥ ឯកឧត្តម ម៉ៅ ហាក់ អនុប្រធានអាជ្ញាធរទន្លេសាប ដឹកនាំក្រុមការងារចូលរួមកិច្ចប្រជុំក្រុមការងារអន្តរក្រសួង ស្ថាប័ន និងអង្គភាពថ្នាក់ក្រោមជាតិ ដឹកនាំដោយឯកឧត្តម សុខ គាង រដ្ឋលេខាធិការ និងប្រធានក្រុមការងារប្រតិបត្តិខេត្តពោធិ៍សាត់ នៅសាលសន្និសីទនៃមន្ទីរពិសោធន៍ជាតិសំណង់ (បរិវេណក្រសួងរៀបចំដែនដី នគរូបនីយកម្ម និងសំណង់)។
សូមបញ្ជាក់ជូនថា កិច្ចប្រជុំនេះ ដើម្បី៖ (១). ពិនិត្យវឌ្ឍនភាពបូកសរុបលទ្ធផលការងារ និងចងក្រងទិន្នន័យក្បាលដី តាមបណ្តាឃុំ ស្រុកពាក់ព័ន្ធនឹងតំបន់បឹងទន្លេសាប ក្នុងភូមិសាស្ត្រខេត្តពោធិ៍សាត់ (២). បន្តពិនិត្យរៀបចំក្រុមការងារចុះផ្ទៀងផ្ទាត់តំបន់២ ដែលស្ថិតនៅក្នុងតំបន់៣ ជាពិសេសតំបន់រាំងទិល និងកោះ នៅកំពង់ថ្កោល ជាដើម (៣). ពិនិត្យរៀបចំផែនទីព្រំរវាងតំបន់១ និងតំបន់២ ដើម្បីប្រមូលផ្តុំទិន្នន័យ ព័ត៌មានការប្រើប្រាស់ដី ស្របតាមស្មារតីអនុក្រឹត្យ ដែលមានធរមាន៕
