ថ្ងៃសៅរ៍ ៨កើត ខែបុស្ស ឆ្នាំម្សាញ់ សប្តស័ក ពុទ្ធសករាជ២៥៦៨ ត្រូវនឹងថ្ងៃទី២៧ ខែធ្នូ ឆ្នាំ២០២៥ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានដឹកនាំគណៈប្រតិភូអាជ្ញាធរទន្លេសាប រួមជាមួយតំណាងក្រសួងស្ថាប័នដែលជាសមាជិករបស់អាជ្ញាធរទន្លេសាប ចុះទស្សនកិច្ចស្វែងយល់ អំពីផលនេសាទ តាមរយៈការធ្វើអាជីវកម្មឡូត៍ដាយនៅតាមដងទន្លេសាប នារដូវបើកនេសាទ តាមគន្លងដាយនីមួយៗដែលបានកំណត់ជ្រើសរើស គឺគន្លងដាយលេខ3B, 8E, 11D, 13A, 14A និងគន្លងទី15B ដើម្បីពិនិត្យមើលពីស្ថានភាពទូទៅលើការធ្វើអាជីវកម្មឡូត៍ដាយ ក្នុងភូមិសាស្ត្ររាជធានីភ្នំពេញ និងខេត្តកណ្តាល។
ក្នុងឱកាសនោះ ឯកឧត្តមរដ្ឋមន្ត្រី និងគណៈប្រតិភូអាជ្ញាធរទន្លេសាប រួមជាមួយឯកឧត្តម គួច ចំរើន អភិបាលនៃគណៈអភិបាលខេត្តកណ្តាល ព្រមទាំងអាជ្ញាធរមូលដ្ឋាន បានអញ្ជើញចុះស្វែងយល់ជាក់ស្តែងការធ្វើអាជីវកម្មឡូត៍នេសាទ គន្លងដាយជួរលេខ15B និងលេខ13A ក្នុងភូមិសាស្ត្រខេត្តកណ្តាល និងសកម្មភាពបងប្អូនប្រជាពលរដ្ឋមកធ្វើការកែច្នៃ ប្រហុក ផ្អក និងត្រីឆ្អើរ នៅតំបន់ឡូត៍ដាយជួរលេខ13A។
សូមជម្រាបជូនថា ការចុះទស្សនកិច្ចស្វែងយល់តាមឡូត៍ដាយ និងក្រៅមាត់ឡូត៍ដាយ គឺមានគោលបំណងពិនិត្យពីបម្រែបម្រួលទន្និផលផលនេសាទធនធានត្រី រួមទាំងទំហំ និងប្រភេទត្រីចេញពីបឹងទន្លេសាប ដែលចាប់បានដោយឡូត៍ដាយ និងការនេសាទដោយឧបករណ៍ផ្សេងទៀត៕
គួរបញ្ជាក់ថា រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៣ ខែធ្នូ ឆ្នាំ២០២៥កន្លងទៅនេះ បានជូនដំណឹងពីរដូវនេសាទឆ្នាំ២០២៥-២០២៦ ដោយបានបញ្ជាក់ថា ត្រីចាប់ផ្ដើមបម្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប នៅក្នុងភូមិសាស្ត្រខេត្តកណ្តាល និងរាជធានីភ្នំពេញ ចាប់ពីថ្ងៃព្រហស្បតិ៍ ៦កើត ដល់ថ្ងៃពុធ ១២កើត ខែបុស្ស ត្រូវនឹងថ្ងៃទី២៥ ដល់ថ្ងៃទី៣១ ខែធ្នូ ឆ្នាំ២០២៥ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង៕
