នាថ្ងៃព្រហស្បតិ៍-សុក្រ ១០-១១ កើត ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១២-១៣ ខែកញ្ញា ឆ្នាំ២០២៤ លោក ខ្វាន់ ភត្ត្រា ប្រធាន.ស្តីទី នាយកដ្ឋានធនធានធម្មជាតិ និងជាសមាសភាពក្រុមការងារថ្នាក់ជាតិអនុវត្តផែនការសកម្មភាពគ្រប់គ្រងភាពរាំងស្ងួត និងអភិវឌ្ឍន៍គ្រប់គ្រងធនធានធានទឹកចម្រុះ បានចូលសិក្ខាសាលាបណ្តុះបណ្តាលស្តីពី ការកសាងសមត្ថភាពនៃកម្មវិធីការគ្រប់គ្រងភាពរាំងស្ងួតចម្រុះ (Integrated Drought Management Programme)។ សិក្ខាសាលាបណ្តុះបណ្តាលនេះ រៀបចំដោយក្រសួងធនធានទឹក និងឧតុនិយម ក្រោមអធិបតីភាព លោកជំទាវ សិទ្ធ វណ្ណារ៉េត ទីប្រឹក្សាក្រសួងធនធានទឹក និងឧតុនិយម និងជាតំណាងអចិន្ត្រៃយ៍ នៃព្រះរាជាណាចក្រកម្ពុជាសម្រាប់អង្គការឧតុនិយមពិភពលោក ដែលមានសមាសភាពចូលរួមពីតំណាងក្រសួងបរិស្ថាន (MOE), តំណាងក្រសួងកសិកម្ម រុក្ខាប្រមាញ់ និងនេសាទ (MAFF), តំណាងក្រសួងអភិវឌ្ឍន៍ជនបទ (MRD), តំណាងគណៈកម្មាធិការជាតិគ្រប់គ្រងគ្រោះមហន្តរាយ (NCDM), តំណាងគណៈកម្មាធិការជាតិទន្លេមេគង្គកម្ពុជា (CMNC), អាជ្ញាធរទន្លេសាប (TSA) និងតំណាងមន្ទីរធនធានទឹក និងឧតុនិយមខេត្តកែប។
សូមជម្រាបជូនថា សិក្ខាសាលាបណ្តុះបណ្តាលនេះមានគោលបំណងចំនួនពីរ៖
១.គោលបំណងចំពោះមុខនៃគម្រោង គឺដើម្បីបង្កើតផែនការសកម្មភាពជាតិគ្រប់គ្រងគ្រោះរាំងស្ងួត និងការកាត់បន្ថយផលប៉ះពាល់ ដោយផ្តោតសំខាន់លើតំបន់ដែលមានហានិភ័យ និងដើម្បីកសាងការរៀបចំស្ថាប័នសម្រាប់ការអនុវត្តផែនការ ប្រកបដោយប្រសិទ្ធភាព និងប្រសិទ្ធផល។
២.គោលបំណងយូរអង្វែងនៃគម្រោង គឺដើម្បីពង្រឹងសម្ថភាពភាពសាំក្នុងការប្រយុទ្ធប្រឆាំងនឹងគ្រោះរាំងស្ងួត និងកាត់បន្ថយផលប៉ះពាល់តាមរយៈផែនការសកម្មភាពដ៏មានប្រសិទ្ធភាព និងការប្រើប្រាស់ធនធានទឹកដោយចីរភាព។
ជាលទ្ធផល (១) ផ្តល់ឱ្យអ្នកចូលរួមនូវការយល់ដឹងដ៏ទូលំទូលាយអំពីគ្រោះរាំងស្ងួត រួមទាំងប្រភេទ និងផលប៉ះពាល់លើវិស័យផ្សេងៗ (២) បំពាក់ឱ្យអ្នកចូលរួមនូវចំណេះដឹងអំពីឧបករណ៍ និងបច្ចេកទេសសម្រាប់ត្រួតពិនិត្យគ្រោះរាំងស្ងួត និងប្រព័ន្ធព្រមានជាមុនប្រកបដោយប្រសិទ្ធភាព និង (៣) ណែនាំឱ្យអ្នកចូលរួមយល់ដឹងអំពីដំណើរការនៃការរៀបចំ និងអនុវត្តផែនការសកម្មភាពគ្រោះរាំងស្ងួត ដោយផ្តល់នូវឧបករណ៍ជាក់ស្តែង ដើម្បីបង្ហាញពីគំនិតសំខាន់ៗ ។
គួរបញ្ជាក់ផងដែរ វគ្គបណ្តុះបណ្តាលលើគ្រោះរាំងស្ងួតនេះមានការចែករំលែកពីស្ថាប័នអន្តរជាតិរួមមាន ដៃគូទឹកសកល(GWP) មជ្ឈមណ្ឌលកាត់បន្ថយគ្រោះរាំងជាតិសហរដ្ឋអាមេរិក(NDMC) មជ្ឈមណ្ឌលអេកូឡូស៊ី និងជលសាស្ត្រអង់គ្លេស (CEH) និង MRC លើបទពិសោធន៍ វិធីសាស្ត្រ សូចនាករ សន្ទស្សន៍ ពហុនិយមន័យគ្រោះរាំងស្ងួត៕
