នាថ្ងៃពុធ ១កើត ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៥ ខែកក្កដា ឆ្នាំ២០២៦ លោកស្រី ទេស សុដាវី អនុប្រធាននាយកដ្ឋានរដ្ឋបាល ផែនការ និងសហប្រតិបត្តិការ នៃអាជ្ញាធរទន្លសាប បានដឹកនាំក្រុមការងារបច្ចេកទេសយេនឌ័ររបស់អាជ្ញាធរទន្លេសាប បន្តរៀបចំកិច្ចប្រជុំផ្សព្វផ្សាយ “ស្តីពីការចូលរួមយេនឌ័រក្នុងការអភិរក្សធនធានជលផល និងបរិស្ថាន” ស្ថិតនៅស្រុកសន្ទុក ខេត្តកំពង់ធំ។ គោលបំណងនៃការចុះអនុវត្តសកម្មភាព ៖
- បន្តធ្វើការផ្សព្វផ្សាយពីច្បាប់បទដ្ឋានគតិយុត្តពាក់ព័ន្ធនឹងវិធានការនៃការចូលរួមការពារ ទប់ស្កាត់ និងគ្រប់គ្រង តំបន់បឹងទន្លេសាបទៅដល់ក្រសួង ស្ថាប័នពាក់ព័ន្ធទាំងថ្នាក់ជាតិ ថ្នាក់ក្រោមជាតិ
- រួមបញ្ចូលសមភាពយេនឌ័រ និងបរិយាបន្នសង្គម តម្រូវឱ្យមានការចូលរួមយ៉ាងសកម្មពីគ្រប់ភាគីក្នុងការអនុវត្តដោយម៉ឺងម៉ាត់ការចាត់វិធានការពារ និងទប់ស្កាត់បទល្មើសនេសាទក្នុងរដូវបិទនេសាទ
- រួបរួមគ្នាគ្រប់ភាគីដាំដុះព្រៃលិចទឹកឡើងវិញ និងបង្កើតតំបន់អភិរក្សត្រីមេពូជ
- លើកទឹកចិត្តប្រជាជនរស់នៅលើគោក និងបង្កើនសេដ្ឋកិច្ចតំបន់ជុំវិញបឹង
- ពង្រឹងការយល់ដឹងសមភាពយេនឌ័រ ជនពិការ និងបរិយាបន្នសង្គម ឱ្យកាន់តែស៊ីជម្រៅពីតួនាទី ភារកិច្ច និងការអភិវឌ្ឍន៍ជីវភាពរបស់សហគមន៍ ដោយមិនរើសអើង
- ផ្សព្វផ្សាយពីសារៈសំខាន់ និងផលប៉ះពាល់ការអភិរក្សធនធានជលផល និងបរិស្ថាន
- ជំរុញការចូលរួមយ៉ាងសកម្មពីគ្រប់ភាគី ដើម្បីធានាថាមានការគ្រប់គ្រងធនធាន ជលផល ប្រសិទ្ធភាព
- បង្កើតឱកាស ដើម្បីបានជាបណ្តាញ និងភាពជាដៃគូជាមួយភាគីពាក់ព័ន្ធ ពង្រឹង ការសម្របសម្រួល និងកិច្ចសហការក្នុងចំណោមវិស័យសាធារណៈ និងឯកជន។
សូមជម្រាបជូនថា ការអនុវត្តសកម្មភាពខាងលើនេះ ដែលស្ថិតនៅស្រុកសន្ទុក ខេត្តកំពង់ធំ បានលើកកម្ពស់ការយល់ដឹងយេនឌ័រ ពីសិទ្ធិ និងតួនាទីស្ត្រី និងបរិយាបន្នសង្គម ក្នុងការចូលរួមមិនរើសអើងប្រកបដោយសមភាព និងសមធម៌ លើការពារ ថែរក្សា ទប់ស្កាត់ និងគ្រប់គ្រងធនធានធម្មជាតិ នៅតំបន់បឹងទន្លេសាបឱ្យមាននិរន្តរភាពសម្រាប់អ្នកជំនាន់ក្រោយ៕
