ថ្ងៃសុក្រ ៥កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៣ ខែមករា ឆ្នាំ២០២៦ តាមការណែនាំចង្អុលបង្ហាញដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប តំណាងក្រសួងធនធានទឹក និងឧតុនិយម មេធាវីប្រចាំក្រសួងធនធានទឹក និងឧតុនិយម និងក្រុមការងារអាជ្ញាធរទន្លេសាប បានចុះពិនិត្យ និងវាយតម្លៃស្ថានភាពការសាងសង់សំណង់រឹង និងការលើកទំនប់អាងទឹកក្នុងតំបន់២ នៅជាប់នឹងព្រំតំបន់៣ នៃតំបន់បឹងទន្លេសាប ត្រង់ចំណុចក្បែរបង្គោលតំបន់៣ លេខ៦២១ ក្នុងភូមិសាស្ត្រ ភូមិត្រកៀត ឃុំមុខប៉ែន ស្រុកពួក ខេត្តសៀមរាប។ ការចុះពិនិត្យដល់ទីតាំងជាក់ស្តែងនេះ មានការអញ្ជើញចូលរួមពី តំណាងមន្ទីរធនធានទឹក និងឧតុនិយម រដ្ឋបាលស្រុកពួក រដ្ឋបាលឃុំមុខប៉ែន កម្លាំងប៉ុស្តិ៍នគរបាលរដ្ឋបាលឃុំមុខប៉ែន រួមនិងតំណាងភាគីម្ចាស់ដី។
សូមជម្រាបជូនថា ការចុះពិនិត្យទីតាំងសំណង់ខាងលើ គឺផ្អែកតាមតួនាទី ភារកិច្ច ដូចមានចែងក្នុងលិខិតបទដ្ឋានជាធរមាន ជាពិសេសអនុក្រឹត្យលេខ: ៨៣ អនក្រ.បក ចុះថ្ងៃទី២៦ ខែមេសា ឆ្នាំ២០២៣៕
