នាព្រឹកថ្ងៃអង្គារ ១៤រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៧ ខែមីនា ឆ្នាំ២០២៦ ដោយទទួលបានការណែនាំ និងចង្អុលបង្ហាញដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប រួមទាំងមន្ត្រីជំនាញ បានអញ្ជើញចូលរួមដឹកនាំកិច្ចប្រជុំពិភាក្សាជាមួយអង្គភាពជំនាញពាក់ព័ន្ធរបស់រដ្ឋបាលខេត្តកំពង់ធំ ស្តីពីការរៀបចំផែនការដាំស្តារព្រៃលិចទឹកឡើងវិញនៅតំបន់ជុំវិញបឹងទន្លេសាប ក្នុងភូមិសាស្ត្រខេត្តកំពង់ធំ ដែលមានការចូលរួមពីឯកឧត្តម អ៊ុង វុទ្ធី អភិបាលរង តំណាង ឯកឧត្តមអភិបាល នៃគណៈអភិបាលខេត្តកំពង់ធំ និងមន្ទីរជំនាញពាក់ព័ន្ធរួមមាន ៖ មន្ទីរធនធានទឹក និងឧតុនិយម មន្ទីរបរិស្ថាន មន្ទីរកសិកម្ម រុក្ខាប្រមាញ់ និងនេសាទ មន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីរអភិវឌ្ឍន៍ជនបទ រួមទាំងអាជ្ញាធរ ស្រុក ឃុំ ពាក់ព័ន្ធតំបន់បឹងទន្លេសាប ដែលមានសមាសភាពសរុបចំនួន ៣៤រូប។
គោលបំណងនៃកិច្ចប្រជុំ៖
- បទបង្ហាញ ស្តីអំពីផែនការដាំស្តារព្រៃលិចទឹកឡើងវិញក្នុងតំបន់ដែលទទួលរងការទន្ទ្រាន តំបន់ព្រៃរេចរិល តំបន់ភ្លើងឆេះព្រៃ ក្នុងភូមិសាស្ត្រខេត្តកំពង់ធំ ដោយមន្ត្រីជំនាញអាជ្ញាធរទន្លេសាប
- កិច្ចពិភាក្សា និងការផ្តល់ធាតុចូលបន្ថែមពីមន្ទីរជំនាញពាក់ព័ន្ធ ដើម្បីធ្វើបច្ចុប្បន្នភាពផែនការដាំស្តារព្រៃលិចទឹកឡើងវិញស្របតាមទីតាំងភូមិសាស្ត្រជាក់ស្តែងនៅតាមតំបន់នីមួយៗប្រកបដោយប្រសិទ្ធភាពខ្ពស់
- ការប្រមូលព័ត៌មានទិន្នន័យ ការចែករំលែក និងផ្លាស់ប្តូរបទពិសោធន៍បច្ចេកទេសពាក់ព័ន្ធកិច្ចការដាំស្តារព្រៃលិចទឹកឡើងវិញ។
ជាកិច្ចចាប់ផ្តើម ឯកឧត្តមប្រធានអង្គប្រជុំ បានថ្លែងអំណរគុណដល់ថ្នាក់ដឹកនាំរដ្ឋបាលខេត្តកំពង់ធំ ដែលបានផ្តល់កិច្ចសហការណ៍យ៉ាងល្អប្រសើរ ជាមួយមន្ទីរជំនាញ និងអាជ្ញាធរពាក់ព័ន្ធ ក្នុងការពិភាក្សាគ្នាស៊ីជម្រៅលើការកំណត់ទីតាំងអាទិភាព សម្រាប់បញ្ជូលក្នុងផែនការដាំស្ដារព្រៃលិចទឹកឡើងវិញ។ ឯកឧត្តមប្រធានអង្គប្រជុំ ក៏បានបញ្ជាក់ផងដែរអំពីសារៈសំខាន់នៃបឹងទន្លេសាប និងជាពិសេសតំបន់ព្រៃលិចទឹកជុំវិញបឹងទន្លេសាប។
បន្ទាប់ពីកិច្ចប្រជុំ ក្រុមការងារដាំស្តារក៏បានចុះពិនិត្យទីតាំងជាក់ស្តែងដីតំបន់៣ ដែលរងការទន្ទ្រាននាពេលកន្លងមក ស្ថិតនៅតំបន់បឹងទទឹងថ្ងៃ និងតំបន់ព្រះស្នែង ក្នុងភូមិសាស្ត្រភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ដោយមានកិច្ចសហការចូលរួមពីលោក ប៉េង សុធារៈ អនុប្រធានមន្ទីរធនធានទឹក និងឧតុនិយម លោក បៃ ឃី មេភូមិខ្សាច់ជីរស់ និងលោក ឡាយ ម៉េងឡុង ប្រធានសហគមន៍នេសាទកំពង់គោ។
ជាលទ្ធផលបឋម៖ អនុលោមតាមសេចក្តីសម្រេចលេខ ៦២១ អទស ចុះថ្ងៃទី៣១ ខែធ្នូ ឆ្នាំ២០២៥ របស់អាជ្ញាធរទន្លេសាប ក្រុមការងារបានរៀបចំកិច្ចប្រជុំ ជាមួយរដ្ឋបាលខេត្ត មន្ទីរជំនាញ និងអង្គភាពពាក់ព័ន្ធ ក្នុងខេត្តទាំង៦ជុំវិញបឹងទន្លេសាប រួមមាន៖ ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងបានបញ្ចប់ត្រឹមខេត្តកំពង់ធំ។ ជាលទ្ធផលបឋម តាមរយៈកិច្ចប្រជុំពិភាក្សា ជាមួយអង្គភាពជំនាញពាក់ព័ន្ធជុំវិញខេត្តទាំង ៦ ព្រមទាំងរដ្ឋបាលក្រុងស្រុក និងឃុំសង្កាត់ទាំងអស់ បានផ្តល់ទីតាំងអាទិភាពសម្រាប់បញ្ជូលក្នុងផែនការដាំស្ដារព្រៃលិចទឹកឡើងវិញ សរុបមានចំនួន ៣៤ទីតាំង។
ជាទិសដៅបន្ត៖ ក្រុមការងារដាំស្តារ អាជ្ញាធរទន្លេសាប នឹងបន្តចុះធ្វើការផ្ទាល់ ដោយពិនិត្យលើទីតាំងថ្នាលបណ្តុះកូនឈើដែលសមស្រប ព្រមទាំងពិនិត្យវាយតម្លៃបន្ថែមទៅលើផ្ទៃដីនៃទីតាំងអាទិភាពជាក់ស្តែង សម្រាប់ការដាំស្តារព្រៃលិចទឹកឡើងវិញ ជាជំហានដំបូងក្នុងឆ្នាំ២០២៦ និងឆ្នាំបន្តបន្ទាប់ ជាមួយអង្គភាពជំនាញពាក់ព័ន្ធជុំវិញខេត្ត ព្រមទាំងរដ្ឋបាលក្រុងស្រុក និងឃុំសង្កាត់ ក្នុងភូមិសាស្ត្រខេត្តទាំង៦ ជុំវិញវិញបឹងទន្លេសាប។
សូមបញ្ជាក់ផងដែរថា យោងលើលិខិតលេខ ៦៩៦ សជណ.កធ ចុះថ្ងៃទី២៥ ខែមេសា ឆ្នាំ២០២៥ របស់ទីស្តីការគណៈរដ្ឋមន្ត្រី ដោយបានឯកភាពជាគោលការណ៍ ជូនក្រសួងធនធានទឹក និងឧតុនិយម (អាជ្ញាធរទន្លេសាប) សហការ ជាមួយក្រសួង ស្ថាប័ន ជំនាញពាក់ព័ន្ធ អាជ្ញាធរដែនដីនៃខេត្តទាំង៦ និងសហគមន៍ ស្ថិតនៅក្នុងខេត្តជុំវិញតំបន់បឹងទន្លេសាប ធ្វើការដាំស្តារព្រៃលិចទឹកឡើងវិញ នៅតាមទីតាំងដែលរងនូវការទន្ទ្រាននាពេលកន្លងមក និងតំបន់រេចរិល ក្នុងភូមិសាស្ត្រខេត្តទាំង៦ ជុំវិញបឹងទន្លេសាប៕
