នាថ្ងៃទី ២៦ ដល់ថ្ងៃទី ២៩ ខែតុលា ឆ្នាំ២០១៦ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប បានដឹកនាំមន្ត្រីបច្ចេកទេសអាជ្ញាធរទន្លេសាប ចុះធ្វើការសិក្សាស្រាវជ្រាវអំពី សក្តានុពលទេសចរណ៍ធម្មជាតិបឹងទន្លេសាប នៅក្នុងភូមិសាស្ត្រខេត្តបាត់ដំបង។ ក្រុមការងារបានបន្តចុះសិក្សាអំពីវិសាលភាពនៃសក្តានុពលនៃតំបន់ស្នូលព្រែកទាល់ ដែលជាមជ្ឃមណ្ឌលឋបនីយជីវមណ្ឌលបឹងទន្លេសាប។ ឋបនីយជីវមណ្ឌលបឹងទន្លេសាប មានទីតាំងបីធំៗ គឺ (១) តំបន់ស្នូលព្រែកទាល់ ស្ថិតនៅភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង (២) តំបន់ស្នូលបឹងទន្លេឆ្មារ ស្ថិតនៅភូមិពាមបាង ឃុំពាមបាង ស្រុកស្ទោង ខេត្តកំពង់ធំ និង (៣) តំបន់ស្នូលស្ទឹងសែន ស្ថិតនៅភូមិផាត់សណ្ដាយ ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។ ក្រុមការងារបានចុះពិនិត្យទីតាំងនៃជម្រកសត្វស្លាបទឹក (R34) ដែលកំពុងកាច់សម្បុកពងកូន និងបានចុះជួបផ្ទាល់ជាមួយក្រុមការងារឧទ្យានុរក្ស ប្រជាជនដែលរស់នៅក្នុងតំបន់ សិក្សាពីសេដ្ឋកិច្ចសង្គមដែលទាក់សេវាកម្មទេសចរណ៍ និងជួបពិភាក្សាជាមួយសហគមន៍ទេសចរណ៍ធម្មជាតិមេជ្រៃ។